Respýblıka kúni – ulttyq mereke.
Memleket basshysy Qasym-Jomart Toqaev Respýblıka kúni elimizde biraz jyl óz deńgeıinde atap ótilmegeni jaıly aıtty, dep habarlaıdy Almaty-akshamy.kz Aqordanyń baspasóz qyzmetine silteme jasap.
«Uly Abaı aıtqandaı, «aqyryn júrip, anyq basa» otyryp, eshqandaı dúrbeleńsiz táýelsizdikke qol jetkizdik. Eń bastysy, biz babalar ańsaǵan azat elge aınaldyq. Álem moıyndaǵan, qurmet tutqan memleket atandyq. Munyń barlyǵy – búkil halqymyzdyń ortaq eńbeginiń jemisi. Respýblıka kúniniń basty qundylyǵy – osynda», - dedi Prezıdent.
Qasym-Jomart Toqaev ádilettilik týraly aıta otyryp, Tuńǵysh Prezıdent Nursultan Nazarbaevtyń elimizdiń egemendikke jetýine qosqan eleýli úlesi baryn atap ótti.
«Túptep kelgende, táýelsizdikke qalaı qol jetkizip, baıandy ete alǵanymyz mańyzdy. Ókinishke qaraı, bul kún elimizde biraz jyl óz deńgeıinde atap ótilgen joq. Biraq, tarıhı ádildik ornady», - dedi ol.
Qazaqstan Prezıdenti Respýblıka kúnine ulttyq mereke mártebesin qaıtarý usynysyn Ulytaýda ótken alqaly jıynda aıtqanyn eske saldy.
«Bul bastama halyqtyń keń qoldaýyna ıe bolyp, tıisti zańǵa ózgeris engizildi. Bıyldan bastap Respýblıka kúni – ulttyq mereke. Endi bul meıramdy el bolyp jańa mazmunda atap ótetin bolamyz. Qaıta jańǵyrǵan Respýblıka kúni – bul halqymyzdyń rýhyn kóterip, eldigimizdi nyǵaıta túsetin asa mańyzdy tarıhı qadam. Sondyqtan, osy mereıli kún azamattarymyzdyń ózara túsinistigin, tutas ultymyzdyń erkin ómirge jáne derbes damýǵa umtylysyn pash etetin mereke bolmaq», - dedi Qasym-Jomart Toqaev.