Oqýshylar bes medal jeńip aldy.
Qazaqstandyq oqýshylar fızıka páninen HHİİ Azıa olımpıadasynda 5 medal jeńip alyp, úzdik úshtikke endi. Ulttyq qurama qorjynynda 1 kúmis jáne 4 qola medal bar, dep habarlaıdy Almaty-akshamy.kz.
«Respýblıkamyzdyń namysyn álemdik arenada Nur-Sultan, Almaty, Pavlodar, Atyraý jáne Aqtóbe qalalarynyń 10-11 synyptarynyń 8 oqýshysy qorǵady. Olardyń barlyǵy Respýblıkalyq fızıka olımpıadasynyń jeńimpazdary men júldegerleri», - delingen Bilim jáne ǵylym mınıstrliginiń baspasóz qyzmetiniń habarlamasynda.
Bıyl zıatkerlik saıystar 2022 jylǵy 24 mamyr men 31 mamyr aralyǵynda qashyqtan formatynda ótti. Oǵan Qytaı, Malaızıa, Rýmynıa, Reseı, Sıngapýr, Saýd Arabıasy, Túrkıa, Taıland, Ońtústik Koreıa, Qyrǵyzstan jáne t.b. sıaqty álemniń 27 eliniń ókilderi qatysty.
«Bilim jáne ǵylym mınıstrligi oqýshylarymyzǵa basqa elderden kelgen jasóspirimdermen jarysqa túsý múmkindigin arttyrý úshin barlyq jaǵdaıdy jasap jatyr. Jaqynda ǵana oqýshylarymyz hımıa páninen 56-shy Halyqaralyq Mendeleev olımpıadasynda 8 medal jeńip aldy. Sondaı-aq oqýshylarymyz alǵash ret Fransıadaǵy Dúnıejúzilik gımnazıadaǵa qatysyp, úzdik úshtikke endi. Fızıka páninen Azıa olımpıadasy eń qıyn olımpıadalardyń biri bolyp esepteletinin aıta ketken jón. Al biz álemdik pándik olımpıadalarda dástúrli túrde kóshbasshy sanalatyn elderdi de basyp ozdyq. Oqýshylarymyz bes medalmen qosa eki qurmet gramotasyna ıe boldy», - dedi «Daryn» respýblıkalyq ǵylymı-praktıkalyq ortalyǵynyń orynbasary Nurlan Jumageldi.
Fızıka páninen Azıa olımpıadasyndaǵy jeńis oqýshylarǵa ulttyq quramaǵa enýge jáne Qazaqstannyń namysyn halyqaralyq fızıka olımpıadasynda (IPhO) qorǵaýǵa múmkindik beredi.