Taraptar ózekti máselelerdi talqylady
Qazaqstannyń Syrtqy ister mınıstri Muhtar Tileýberdi Máskeýge jasaǵan is-saparynda reseılik áriptesi Sergeı Lavrovpen kezdesti. Taraptar Reseı men Ýkraına arasyndaǵy kelissózderdi, ekonomıkalyq sanksıalar men bıologıalyq qaýipsizdik sıaqty birqatar ózekti máseleni talqylady, dep habarlaıdy Almaty-akshamy.kz 24.kz-ke silteme jasap.
Muhtar Tileýberdi josparda tórtinshi deńgeıdegi bıologıalyq zerthana qurylysy bar ekenin aıtyp, elimizdiń halyqaralyq yntymaqtastyqty damytýǵa nıetti ekenin bildirdi.
Muhtar Tileýberdi, QR Syrtqy ister mınıstri:
- Kún tártibindegi bıologıalyq qaýipsizdik – ózekti máselerdiń biri. Ásirese koronavırýs pandemıasynan keıin bul máseleniń mańyzdylyǵy arta tústi. Osy oraıda biz Reseımen birlese áreket etip otyrmyz. Prezıdentimiz Qasym-Jomart Toqaevtyń BUU júıesinde bıologıalyq qaýipsizdik jóninde halyqaralyq agenttik qurylýy kerek degen bastamasyn reseılik áriptesterdiń qoldaý bildirgenine qýanyshtymyz. Búgin 4-deńgeıdegi bıologıalyq zerthananyń qurylysy boıynsha josparymyzben bólistik. Bul ashyq proses. Biz halyqaralyq yntymaqtastyqqa daıynbyz. Bul salada elimizge reseılik ǵalymdar men zerthana mamandary da shaqyrylady, - dedi.
Eki eldiń mınıstrleri aımaqaralyq jáne shekaradaǵy seriktestikti nyǵaıtý, energetıkalyq-janarmaı, sonymen qatar ǵarysh salasyndaǵy túıtkilderge de erekshe toqtaldy. Kezdesý memleketaralyq dıplomatıalyq qatynastyń 30 jyldyǵyna oraı ótetin is sharalar josparyn maquldaýmen aıaqtaldy.
Muhtar Tileýberdi, QR Syrtqy ister mınıstri:
– Árıne qazirgi jaǵdaıǵa baılanysty memleketterdiń arasynda halyqaralyq yntymaqtastyqty odan ári damytý jáne de aımaqtyq halyqaralyq uıymdarda bizdiń qarym -qatynastardy odan ári nyǵaıtý máseleleri talqylandy.
Sergeı Lavrov, RF Syrtqy ister mınıstri:
– Biz ózimizge jáne Qytaı Halyq Respýblıkasy sıaqty ózge elderdegi seriktesterge senim artýymyz kerek. Bul tendensıaǵa Ońtúsik Shyǵys Azıa elderi de tartylyp jatyr. Onyń ishinde Úndistanmen yntymaqtastyǵymyz qarqyndy damyp keledi. Kólik dálizin qurý boıynsha seriktestik ornaýda. Bul óz kezeginde Eýrazıalyq ekonomıkalyq odaqqa da tıimdi.