Úkimette keńes ótti
Úkimettiń Sıfrlyq keńsesinde QR Premer-Mınıstri Álıhan Smaıylov áleýmettik mańyzy bar azyq-túlik taýarlarynyń baǵasyn ustap turý, sondaı-aq «SQ-Farmasıa» JSHS bazasynda medısınalyq tehnıkany ortalyqtandyrylǵan satyp alýǵa kóshý máseleleri jóninde keńes ótkizdi, dep habarlaıdy Almaty-akshamy.kz Úkimettiń resmı saıtyna silteme jasap.
Baıandama jasaǵan QR Saýda jáne ıntegrasıa mınıstrliginiń Saýda komıtetiniń tóraǵasy Erjan Qazanbaev ótken aptada áleýmettik mańyzy bar azyq-túlik taýarlary baǵasynyń ósimi 0,6%-dy quraǵanyn habarlady. Atap aıtqanda, pıaz 2,9%, qyryqqabat 2,8%, qus eti 2,5%, sábiz 2,3%, qant 1,5%-ǵa qymbattady. Óńirler arasynda baǵanyń eń joǵary ósýi Nur-Sultan (0,9%) jáne Almaty (0,8%) qalalarynda tirkeldi.
Onyń aıtýynsha, elimizde saýda ústemesin baqylaý jumystary aıasynda úı mańyndaǵy 32 308 dúken tekserildi (qamtý – 77%), sonyń nátıjesinde 358 buzýshylyq anyqtaldy. Barlyq faktiler boıynsha tıisti sharalar qabyldandy. Aýyl sharýashylyǵy mınıstri Erbol Qarashókeevtiń aıtýynsha, búgingi tańda Qazaqstanda azyq-túliktiń (jańa ónimdi eseptemegende 669 841 tonna), onyń ishinde sıyr eti, kartop, un, jumyrtqa, sút jáne t. b. edáýir qory qalyptastyrylǵan.
Sondaı-aq QR Premer-Mınıstri ÁMAT baǵasynyń eń joǵary ósimi tirkelgen Nur-Sultan qalasy ákiminiń orynbasary Erlan Bekmurzaevtyń jáne Almaty qalasy ákiminiń orynbasary Álisher Ábdiqadyrovtyń, sondaı-aq respýblıka boıynsha qyryqqabattyń eń joǵary baǵasy (kılogramyna 340 teńge) tirkelgen Pavlodar oblysynyń ákimi Ábilqaıyr Sqaqovtyń esepterin tyńdady. Keńesti qorytyndylaı kele, Álıhan Smaıylov baǵany ustap turý máseleleri birinshi kezekte mańyzdy ekenin atap ótti.
«Men birneshe ret "aınalym sqemasyn" qarjylandyrýdy arttyrýdy tapsyrdym, alaıda búginde jumys tıisti deńgeıde oryndalmady. Osy aıdyń aıaǵyna deıin qarjylandyrýdy 100 mlrd teńgege deıin ulǵaıtý qajet. Bul kórsetkishti maqsatty deńgeıge jetkizbeıtin óńirlerde ákimderdiń atalǵan salaǵa jetekshilik etetin orynbasarlaryna tıisti shara qoldaný týraly usynystar qaralatyn bolady», — dedi Úkimet basshysy.
Álıhan Smaıylov aldaǵy agrarlyq maýsym qarsańynda óńirlerdiń basty mindeti kúzgi aýyl sharýashylyǵy ónimderin jetkizýge forvardtyq sharttar jasasý bolýy tıis ekenin atap ótti. Aýyl sharýashylyǵy mınıstrligine ákimdiktermen birge baǵany ustap turý maqsatynda aýyl sharýashylyǵy ónimderin jedel túrde tikeleı jetkizý úshin óndiris pen tutyný teńgerimin turaqty negizde ózektendirip otyrý tapsyryldy. Kún tártibindegi ekinshi másele boıynsha sóz sóılegen densaýlyq saqtaý mınıstri Ajar Ǵınıat «SQ-Farmasıa» JSHS medısınalyq tehnıkasyn ortalyqtandyrylǵan satyp alýǵa kóshý Memleket basshysynyń tapsyrmasyna sáıkes júrgizilip jatqanyn eske saldy. Bıyl jobany pılottyq rejımde iske asyrý josparlanyp otyr, al 2023 jyldan bastap jabdyqtardy jergiliktendirý nemese kelisimsharttyq negizde óndirý boıynsha uzaq merzimdi sharttar jasalady. Talqylaý qorytyndysy boıynsha Úkimet basshysy beıindi Mınıstrlikke ákimdikter kótergen máselelerdi eskere otyryp, ortalyqtandyrylǵan satyp alý tetikterin pysyqtaýdy jáne Úkimetke tıisti usynystar engizýdi tapsyrdy.