Jalpy eksporttyq áleýet 170 mıllıon dollarǵa baǵalanady
Indýstrıa jáne ınfraqurylymdyq damý mınıstri Qaıyrbek Óskenbaev Qazaqstan-Grýzıa saýda-ekonomıkalyq yntymaqtastyq jónindegi úkimetaralyq komısıanyń on birinshi otyrysyn qorytyndylady. Oǵan jasaǵan jumys sapary barysynda qatysty, dep habarlaıdy Almaty-akshamy.kz mınıstrliktiń Telegram–daǵy kanalyna silteme jasap.
Vedomstvo basshysy habarlaǵandaı, otyrys barysynda taraptar Transkaspıı halyqaralyq kólik baǵdaryn damytý perspektıvalaryn qarastyrdy. Qaıyrbek Óskenbaev bul baǵytta qazaqstandyq eksporttyń ulǵaıatynyn, onyń ishinde Qytaıdan tranzıttiń kólemi ulǵaıa beretinin, osy oraıda Grýzıa aýmaǵy arqyly tranzıttiń yńǵaılylyǵyn saqtaı otyryp, yntymaqtastyqty odan ári damytý kerektigin atap ótti.
«Transkaspıı baǵyty Grýzıa eksportynyń saýdasyn odan ári keńeıtýge katalızator bolady. Kaspıı teńizinde qolaıly básekege qabiletti tarıfti belgileýge yqpal etetin tórt parom salýdy josparlap otyrmyz», - dedi mınıstr.
Buǵan deıin habarlanǵandaı, 31 naýryzda Grýzıa, Ázerbaıjan, Túrkıa jáne Qazaqstan Transkaspıı halyqaralyq kólik dálizin damytý týraly tórtjaqty málimdemege qol qoıdy. Ol sondaı-aq eki el arasyndaǵy ózara saýda-sattyqty arttyrý úshin aıtarlyqtaı áleýet bar ekenin atap ótti.
Qazaqstandyq kompanıalar metalýrgıa, munaı-hımıa, tamaq jáne mashına jasaý, sondaı-aq farmasevtıka syndy birqatar salada óńdelgen taýarlar eksportyn arttyrýǵa daıyn. Jalpy eksporttyq áleýet 170 mıllıon dollarǵa baǵalanady. Óz kezeginde, úkimetaralyq komısıa otyrysynda Grýzıanyń vıse-premeri, ekonomıka jáne turaqty damý mınıstri Levan Davıtashvılı eldiń sıyr etin, sút ónimderin, makaron ónimderin, ósimdik maıy men bıdaı unyn jetkizýge múddeli ekenin atap ótti.
Qazaqstan eksporttaýshy kásiporyndardyń tizbesin usynýǵa, sondaı-aq ekonomıkanyń túrli salalarynda 40 ataý boıynsha Grýzıaǵa ónim eksportyn ulǵaıtýǵa daıyn ekenin jetkizdi. Sonymen qatar, Qazaqstan astyq eksporttaýshylary naryq negizinde Grýzıa naryǵyna bıdaı jetkizýge daıyn.
Sondaı-aq, otyrys barysynda taraptar avtomobıl kóligimen júk tasymaldaý úshin 2022 jylǵa ruqsat blankilerin jáne 2023 jylǵa aldyn ala kvota almastyrýdy belgiledi. Sonymen qatar, qazaqstandyq tarap grýzıalyq avıakompanıalarǵa Qazaqstanǵa turaqty reıs ushyrýdy usyndy. Búgingi tańda otandyq «Eır Astana», «Fly Arystan» jáne «SCAT» avıakompanıalary Grýzıaǵa turaqty túrde 19 reıs oryndaıdy. Qazaqstan men Grýzıa Úkimetaralyq komısıasynyń on birinshi otyrysy eki el arasyndaǵy dıplomatıalyq qatynastyń ornaǵanyna 30 jyl tolýyna oraı ótkizildi.