Qazaqstandyq ǵalymdar Qyzyl kitapqa engen ósimdikterdi tyń ádispen kóbeıtip jatyr.
Ulttyq bıotehnologıa ortalyǵynda mamandar japyraqtan, tamyrdan, tipti bir jasýshanyń ózinen jańa ósimdik ósirip shyǵady, dep habarlaıdy Almaty-akshamy.kz Qazaqtv.com saıtyna silteme jasap.
Bul, ásirese, joıylyp bara jatqan ósimdik túrlerin saqtap qalý úshin mańyzdy. Bir mıkromaterıaldyń aǵashqa aınalýyna 2 jyldaı ýaqyt qajet.
«Bul Qyzyl kitapqa enetin, sırep bara jatqan ósimdiktermen jumys isteý úshin mańyzdy. Onyń ústine biz ósimdikterdi tuqymsyz ósirý tásilderin damytýdy burynnan qolǵa alǵanbyz. Osy jaǵynan alyp qaraǵanda da tıimdi», - dedi «Ulttyq bıotehnologıa ortalyǵy» RMK Bas dırektory Erlan Ramanqulov.
Kóshetter men tuqymnyń jańa suryptary birden egilmeıdi. Eń aldymen, makro jáne mıkroelementtermen shaǵyn ydystarda jetildiriledi. Býdandastyrýdyń ereksheligi de osy. Ósimdik quramyndaǵy elementterdi baqylaýǵa múmkindik bar. Kóbeıtýdiń jasandy ádisin qoldanylsa da, jańa óskinder tabıǵı qasıetterin joǵaltpaıdy. Sodan keıin kóshetterdi elorda kóshelerine otyrǵyzady.
«Biz aq terekti aldyq, sosyn qyzyl kitapqa enetin ósimdikti aldyq, ıablonı-nedveskogo. Sıvers alma aǵashy men malınsk aǵashyn aldyq. Qyzǵylt, ádemi gúldeıdi, sony aldyq. Astananyń aýa raıynda jaqsy ósedi. Tabıǵatta ósken ósimdikti kóp alyp shyǵaramyz. Bir búrshikten birneshe myń ósimdik shyǵaramyz», - deıdi «Ulttyq bıotehnologıa ortalyǵy» RMK Zerthanasynyń meńgerýshisi Almagúl Kákimjanova.
Qazaqstandyq ǵalymdar osyndaı tyń tásilmen 3 jyldyń ishinde 7 myńǵa jýyq aǵash egip, ósiripti. Aldaǵy ýaqytta ósimdikterdi býdandastyrýdyń ózge tásilderin qoldanyp, damytý josparda bar.