Qala aýmaǵynda elektrli samokattardyń jyldamdyǵy – 25 km/saǵ bolyp bekitildi.
Almaty qalasynyń ákimdigi men elektrli samokattardy jalǵa beretin operatorlar megapolıste qural qoldanysyn retteý maqsatynda yntamaqtastyq pen ózara túsinistik týraly memorandýmǵa qol qoıdy, dep habarlaıdy Almaty-akshamy.kz
Memorandým aıasynda elektrli samokattarmen jaıaý júrginshiler jolaǵynda, saıabaqtarda jáne buqaralyq is-sharalar ótetin qoǵamdyq oryndarda júrýge tyıym salynady. Qala aýmaǵynda elektrli samokattardyń jyldamdyǵy – 25 km/saǵ bolyp bekitildi.
Sondaı-aq, elektrli samokattardy tek 16 jasqa tolǵan tulǵalar ǵana jalǵa ala alady. Operatorlar metro men qoǵamdyq oryndardyń kireberisinde, kógalda, kólik jáne jaıaý júrginshiler jolaǵynda qaldyrylǵan elektrli samokattardyń birden arnaıy oryndarǵa jetkizilýin qamtamasyz etýi tıis. Ol úshin qalada elektrli samokattarǵa arnalǵan turaq aýmaqtary uıymdastyrylady.
Kelesi jyldyń sońyna deıin elektrli samokattarǵa arnalǵan 3 000 turaq ornyn uıymdastyrý josparda. Sondaı-aq, taraptar servıs jumysyn qys mezgilinde aýa raıyna baılanysty júrgizýdiń naqty sharttaryn belgiledi. Mysaly, 15 jeltoqsannan 20 aqpanǵa deıin ortasha aýa temperatýrasy 2 gradýstan tómendegen jaǵdaıda jalǵa berý aýmaǵy qysqarady ári elektrli samokattardyń 10%-y ǵana jalǵa beriledi.
Atalǵan memorandým sharttarynda kórsetilgen barlyq pýnkterdi júzege asyrý nátıjesinde elektrli samokattardyń qoldanysyn retteý, qaýipsizdik deńgeıin arttyrý, tıisti ınfraqurylymdy damytýdy qamtamasyz etý josparlanǵan. Jalpy, mıkromobıldi kóliktiń, onyń ishinde elektrli samokattardyń damýy qorshaǵan ortany lastaý deńgeıi men jeke kólikpen júrý jıiligin tómendetýge áser etetindigi, bul óz kezeginde qala kósheleriniń júktemesin tómendetýge de yqpal etetindigi atalyp ótti.
Kún saıyn qalada elektrli samokattarmen 100 myńǵa jýyq qozǵalys qamtamasyz etiledi. Eske salsaq, elektrli samokattar Almaty qalasynda 2018 jyly 100 danadan bastap jalǵa berile bastady. Qazirgi kezde qalada 4 kompanıa (Ozim, Jet, Eleven, Whoosh) 15 myń samokatty jalǵa berý qyzmetin usynady.