Qazaqstan Densaýlyq saqtaý mınıstrligi Qytaı ǵalymdary jarqanattardan jańa koronavırýs tapqany týraly sheteldik BAQ-ta jarıalanyp jatqan aqparatqa qatysty málimdeme jasady, dep habarlaıdy aqshamnews.kz.
"Keıbir sheteldik buqaralyq aqparat quraldarynda qytaılyq ǵalymdardyń jarqanattarda (HKU5) jańa koronavırýs tapqany týraly aqparat paıda boldy, bul janýardan adamǵa juǵý qaýpin týdyrady. Alaıda Dúnıejúzilik densaýlyq saqtaý uıymynyń, AQSH aýrýlardy baqylaý jáne aldyn alý ortalyǵynyń jáne Qytaıdyń aýrýlardy baqylaý jáne profılaktıka ortalyǵynyń resmı saıttarynda bul vırýs týraly resmı aqparat joq", - delingen mınıstrlik habarlamasynda.
Mınıstrlik aýrýdyń aldyn alý úshin kelesi profılaktıka sharalaryn saqtaýdy usyndy: adamdar kóp jınalatyn oryndarǵa, ásirese jabyq úı-jaılarǵa barýdy shekteý; úı-jaılardy únemi jeldetý; qoldy tazalaý úshin antıseptıkterdi nemese dezınfeksıalyq maılyqtardy paıdalaný; naýqas adamdarmen baılanysty shekteý, olardyń oqshaýlanýyn qamtamasyz etý.
Koronavırýstyq ınfeksıa boıynsha eldegi jaǵdaı da turaqty bolyp qala beredi. Jyl basynan beri elde KVI-diń 116 jaǵdaıy tirkeldi, ótken jyldyń sáıkes kezeńimen salystyrǵanda syrqattanýshylyq 8 ese tómendedi. Ólim jaǵdaılary joq. Sońǵy monıtorıń derekteri boıynsha omıkron kishi nusqasynyń aınalymy anyqtalǵan.
Mınıstrlik aqparatyna sáıkes, epıdemıologıalyq maýsym bastalǵaly beri respýblıkada JRVI-diń 3,1 mln jaǵdaıy tirkeldi, bul ótken maýsymnyń uqsas kezeńine qaraǵanda 20%-ǵa az. Osy epıdemıologıalyq maýsymda zerthanalyq rastalǵan tumaýdyń 2370 jaǵdaıy tirkeldi, bul ótken epıdemıologıalyq maýsymnyń deńgeıine sáıkes keledi. Búginde 2,3 mln astam adam tumaýǵa qarsy ekpemen egildi.