Bul - áleýmettik mańyzy bar tegin shara.
16 qyrkúıekte eldiń barlyq iri qalasynda – Almaty, Nur-Sultan, Qonaev, Aqtóbe, Taraz, Túrkistan, Aqtaý, Qostanaı, Óskemen, Petropavl, Pavlodar, Qaraǵandy, Balqash, Oral, Qyzylorda, Shymkent, Atyraý, Kókshetaý, Taldyqorǵan qalalarynda «Halyq zańgeri» jalpyrespýblıkalyq áleýmettik mańyzy bar tegin aksıa bastalady, dep habarlaıdy Almaty-akshamy.kz Baq.kz silteme jasap.
Sharany Sybaılas jemqorlyqqa qarsy is-qımyl agenttigi, Zakon.kz ınternet-basylymy, «Paragraf» aqparattyq júıesi, memlekettik organdar, belgili zańgerler men quqyq qorǵaýshylar uıymdastyrady.
Jobanyń maqsaty – azamattardyń, ásirese, halyqtyń osal toptaryna: az qamtylǵandarǵa, kóp balaly otbasylarǵa, jalǵyzbasty analar, múmkindigi shekteýli jandar, shaǵyn jáne orta bıznes ókilderi, stýdentter jáne basqa da kóptegen azamattardyń quqyqtyq saýatyn arttyrý jáne tegin zańgerlik kómek kórsetý.
"Halyq zańgeri" aksıasynyń aýqymy kún saıyn keńeıip keledi. Oǵan iri qalalardan bólek basqa da eldi mekender – oblys ortalyqtary, elimizdiń barlyq óńirindegi aýdandar men aýyldar qosylýǵa nıetti. Bul óńirlerde jergilikti atqarýshy organdar múmkindiginshe sol kúni bir mezgilde azamattardy qabyldaıdy.
Buryn-sońdy bolmaǵan biregeı «Halyq zańgeri» aksıasy 2016 jyly ótkizile bastady. Bul ıdeıany elimizdiń barlyq zańgerlik qaýymy qoldady. Aksıa qarapaıym qazaqstandyqtardyń kóńilinen shyǵyp, keıinnen suranysqa ıe bolǵany sonsha, uıymdastyrýshylar ony jyl saıyn úlken qalalar men óńirlerde ótkizýdi uıǵardy.
2020-2021 jyldary ǵana aksıa májbúrli úzilis jasady. Ol kezde Qazaqstanda, sonymen qatar búkil álemde koronavırýs pandemıasyna baılanysty karantın sharalary engizildi.
Sanıtarlyq-epıdemıologıalyq jaǵdaı turaqtalǵannan keıin uıymdastyrýshylar jobany qaıta bastaý týraly sheshim qabyldady: bul joly aksıa 16 qyrkúıek kúni saǵat 16.00-de bastalady.
«Kez kelgen azamat «Halyq advokaty» aksıasyna kelip, ózin qyzyqtyratyn barlyq quqyqtyq másele men daý boıynsha úzdik, kásibı deńgeıi joǵary zańgerlerden, sonyń ishinde tájirıbeli, bedeldi advokattardan, notarıýstardan, prokýrorlardan, tegin, tolyq kólemde qajet kómek pen keńes ala alady. Keńes berýshiler qatarynda tergeýshiler, sot oryndaýshylary, polısıa qyzmetkerleri, kámeletke tolmaǵandarmen jumys isteıtin qyzmetkerler, ádilet, kóshi-qon polısıasy, bank ombýdsmeni, sonymen qatar jaýapty basshylyq qyzmetterdi atqaratyn ÚEU jáne memlekettik organdardyń ókilderi bolady», - delingen habarlamada.
Zańgerler keńes beredi, al memlekettik organdar azamattardy qabyldaıdy. Azamattardy qabyldaý ýaqyty shektelmeıdi, sońǵy adam kelgenge deıin jalǵasady.
«Halyq zańgeriniń» qyzmetin paıdalanǵysy keletinder jyldan jylǵa kóbeıip keledi. Tek 2016-2019 jyldar aralyǵynda 100 myńnan astam ótinish berýshi tegin zań kómegin aldy, 7 myńnan astam zańger men memlekettik qyzmetkerler olardyń suraqtaryna jaýap berdi.
Suraqtar ómirdiń ózi sıaqty alýan túrli. Bireý azamattyq, bireý qylmystyq is boıynsha aqyldasqysy keledi. Bireý turǵyn úı zańnamasy, bireý eńbek, bank, jer, salyq... Bireý otbasy jáne neke qatynastary máselesi, bireý muragerlik, jyljymaıtyn múlik, aıyppuldar, nesıe berý, kıberbýllıng jáne taǵy basqa týraly suraǵysy keledi. Kóbine adamdar quqyqtyq janjal týyndaǵan jaǵdaıda ózin qalaı qorǵaıtynyn, neden bastaý kerek ekenin bilmeıdi. Osy tusta «Halyq zańgeriniń» baǵa jetpes kómegi qajet.
Halyqtyń qamtylýy men aýmaǵy jaǵynan «Halyq zańgeriniń» Qazaqstanda ǵana emes, álemde teńdesi joq. Qazaqstan – «Halyq zańgeri» sıaqty biregeı aýqymdy aksıa dúnıege kelgen jáne odan ári qarqyn alyp kele jatqan alǵashqy jáne jalǵyz memleket. Búkil halyqqa bir mezgilde tegin zańgerlik keńes berý eshbir elde bolǵan emes.
Bul joba shynymen de elde jalpyhalyqtyq sıpatqa jáne jalpyulttyq, memlekettik mánge ıe boldy.
«Halyq zańgeri» quqyqtyq demokratıalyq memleketimizdiń, ortaq úıimizdiń damýyna úles qosyp keledi. Munda zańnyń ústemdigi, azamattardyń quqyǵy men bostandyǵyn saqtaý absolútti basymdyqqa aınalýǵa tıis.