Qazaqstandyq QazVac vaksınasy birinshi komponentiniń 5 myń dozasy jáne ekinshisiniń 5 000 dozasy qalalyq emhanalarǵa, saýda oıyn-saýyq ortalyqtary men saýda úılerine bólindi.
Nur-Sultan qalasynyń qoǵamdyq densaýlyq saqtaý basqarmasynyń qoımasyna otandyq vaksınanyń 10 myń dozasy jetkizildi, dep habarlaıdy Almaty-akshamy.kz Nur-Sultan qalalyq ákimdigine silteme jasap.
Otandyq preparatty «Medıker Astana» JSHS, «Medıker pedıatrıa», «Otbasylyq dárigerler klınıkasy», UMC korporatıvtik qorynan alýǵa bolady.
«Jergilikti vaksına birazdan beri bolǵan joq. Jurttyń bir bóligi bul vaksınanyń túsýin kútip júrdi, endi ol qolymyzǵa tústi. Aıta keteıik, vaksınalar QR Densaýlyq saqtaý mınıstrligi SK-Farmasıamen birlesken buıryǵy men kestesine sáıkes taratylady. 10 myń doza tizim boıynsha qolda bar vaksınalaý pýnktterine úlestiriledi. Búgin-erteń egý pýnktterine jetkizilýi tıis», - dedi qoǵamdyq densaýlyq saqtaý basqarmasy.
Basqarma ekinshi komponentti alýda qıyndyq boldyrmas úshin azamattardan múmkindiginshe bir jerden alýdy, ıaǵnı eki komponentti de bir egý pýnktinde alýdy suraıdy.
«Birinshi komponentti bir pýnktten, ekinshisin múldem basqa pýnkten alýǵa kelgender boldy. Biz qala turǵyndarynan tıisti ýaqytty saqtaı otyryp, vaksınany bir pýnktte alýdy suraımyz», - dep tolyqtyrdy basqarma.
Qazirgi ýaqytta elordada vaksınanyń eki túri bar: reseılik «Spýtnık» jáne qazaqstandyq «QazVac».