Azıadaǵy ózara is-qımyl jáne senim sharalary keńesiniń (AÓSSHK) 7-shi Syrtqy ister mınıstrleriniń otyrysy onlaın formatta ótti.
Onyń barysynda Qazaqstan Respýblıkasy uıymdaǵy tóraǵalyǵyn resmı túrde Ázerbaıjan Respýblıkasyna tapsyrdy, dep habarlaıdy aqshamnews.kz SİM saıtyna silteme jasap.
İs-shara barysynda QR Premer-Mınıstriniń orynbasary – Syrtqy ister mınıstri Murat Nurtileý Qazaqstannyń tóraǵalyǵy kezindegi AÓSSHK-tiń negizgi jetistikterin atap ótip, uıymnyń tórt jyldyq jumysyn qorytyndylady.
Atap aıtqanda, 2022 jylǵy qazanda Astanada ótken AÓSSHK 6-shy Samıtiniń qorytyndysy boıynsha iske qosylǵan transformasıa úderisine erekshe nazar aýdaryldy. 2023 jylǵy qyrkúıekte qabyldanǵan Transformasıa jónindegi jol kartasyna sáıkes, Qazaqstan tóraǵalyǵy Keńes Jarǵysynyń jobasyn ázirlep, kelistirý úderisin bastady. Atalǵan kezeńde Qazaqstan Taldaý ortalyqtar forýmy, Danalar keńesi jáne AÓSSHK qory sıaqty úsh jańa organnyń ashylýyna bastamashylyq etti.
Sonymen qatar, M. Nurtileý óz sózinde óńirlik tranzıt-kóliktik ózara baılanys, aqparattyq-kommýnıkasıalyq tehnologıalardy damytý jáne klımattyń ózgerýi máseleleri boıynsha Qazaqstan Respýblıkasynyń syrtqy saıası basymdyqtaryn atap ótti.
Mınıstr Qazaqstan AÓSSHK-tiń budan ári damýyna beıildi ekenin rastap, onyń biregeı formaty men geografıasyn eskere otyryp, Keńestiń eleýli perspektıvalary men zor bolashaǵyna senim bildirdi.
Otyrys barysynda qatysýshylar múshe memleketter arasyndaǵy qatynastardy retteıtin Qaǵıdattar deklarasıasynyń 25-jyldyǵy týraly málimdeme, Senim sharalaryn júzege asyrý modáldiligi týraly sheshim, Senim sharalarynyń jańartylǵan katalogy sıaqty birqatar qujattardy qabyldady. Sondaı-aq AÓSSHK múshe memleketterdiń jetekshi ýnıversıtetteriniń Seriktestik jelisin iske qosty.
İs-shara qorytyndysy boıynsha múshe memleketter AÓSSHK-tegi qazaqstandyq tóraǵalyqtyń jumysyna joǵary baǵa berip, Keńesti ınstıtýttandyrýdaǵy aıtarlyqtaı jetistikterin atap ótti.
İs-sharaǵa Ázerbaıjan, Qytaı, Pákistan, Bangladesh, Shrı-Lanka, Tájikstan, Ózbekstan jáne basqa da múshe memleketter men baıqaýshy elderdiń syrtqy saıası vedomstvolary basshylary, sonymen qatar BUU, Halyqaralyq kóshi-qon uıymy, Arab memleketteri Lıgasy, TúrkPA, Ekonomıkalyq yntymaqtastyq uıymy, SHYU, EEK jáne BUU-nyń Esirtki jáne qylmys jónindegi basqarmasy sıaqty 9 halyqaralyq uıymnyń ókilderi qatysty.