Qazaqstan álemdegi qylmys deńgeıi boıynsha 47-orynda tur, dep habarlaıdy almaty-akshamy.kz inbusiness.kz silteme jasap.
Qazaqstan 2022 jylǵy birinshi jartyjyldyqtaǵy qylmys deńgeıi boıynsha 142 eldiń ishinde 47-orynda boldy. Atalǵan kezeń ishinde elde 87,1 myń qylmystyq quqyq buzýshylyq tirkelgen. Bul byltyrǵy jylmen salystyrǵanda 1,1%-ǵa artyq.
Qylmys deńgeıi qylmys ındeksin baǵalaý negizinde esepteledi. Mysaly, 0-den 19,99-ǵa deıingi ındeks qylmystyń óte tómen deńgeıin bildirse, 20-39,99 aralyǵyndaǵy ındeks tómen deńgeıin kórsetedi. 40-tan 59,99-ǵa deıin qylmystyń ortasha deńgeıin, al 60-tan 79,99-ǵa deıin joǵary deńgeıin bildiredi. Indeks 80-nen joǵary bolsa, qylmystyń deńgeıi de órship turǵanyn kórsetedi.
Álemdegi qylmys deńgeıi eń joǵary elder qataryn Venesýela (83,16) men Papýa-Jańa Gvıneıaǵa (80,26) bastap tur. Bestikter qataryna Aýǵanstan (78,19), OAR (75,37) jáne Gondýras (74,66) elderi kirgen. Belarýs (32-oryn) pen Qyrǵyzstanda (36-oryn) qylmystyń ortasha deńgeıi tirkelgen. Al, qylmystyń tómen deńgeıi baıqalǵan elder ishinde Reseı, Armenıa jáne Ózbekstan bar.
Álem boıynsha Katar, BAÁ, Taıvanda qylmystyń eń tómen deńgeıi baıqalǵan.
Osy tusta reıtıńtegi oryn neǵurlym joǵary bolsa, eldegi qylmys jaǵdaıy soǵurlym nashar ekendigin atap ótý kerek. Qylmys deńgeıi boıynsha elderdiń reıtıńi jylyna 2 ret jasalady. Oǵan sońǵy 36 aıdaǵy derekter paıdalanylady.