Germanıada Berlınale halyqaralyq kınofestıval aıasynda Eýropa kınonaryǵy ótip jatyr.
Bul – Eýroodaqtaǵy kıno salasynyń ókilderi men jalǵa berýshiler bas qosatyn iri alań. Kompanıalar týyndylaryn usynyp, sala máselelerin talqylaıdy, dep habarlaıdy Almaty-akshamy.kz 24.kz-ke silteme jasap.
Bıyl oǵan Sháken Aımanov atyndaǵy kınoındýstrıa qatysyp jatyr. Olar Berlınde jańa seriktester taýyp, otandyq kınony ilgeriletýge nıetti. Otandyq mamandar Aqan Sataevtyń «Uly dala tańy», Bolat Qalymbetovtyń «Muqaǵalı», Dárejan Ómirbaevtyń «Aqyny» sekildi kartınalardy aparǵan. Jalpy, Qazaqfılm qorjynynda 800 kınotýyndy bar.
«Qazaqfılm úshin Eýropanyń kınonaryǵyna qatysý strategıalyq turǵydan óte mańyzdy. Shyǵarmashylyq alań Qazaqfılmge óziniń kontentin usynyp, yntymaqtastyqty damytý joldaryn qarastyrýǵa múmkindik beredi. Biz Eýroodaq elderimen kezdesýler ótkizip jatyrmyz. Latyn Amerıkasymen baılanys ornatsaq degen nıetimiz bar», - deıdi Sh. Aımanov atyndaǵy «Qazaqfılm» AQ dıstrıbýsıa bóliminiń basshysy Laýra Sabanbaeva.
«Biz iri kınofestıvalderge ǵana emes, rejıserlerge óz týyndylaryn kórsetýge múmkindik beretin ózge de sharalarǵa qatysýǵa daıynbyz. Mysaly, Kottbýs festıvalindegi basqosýlar óte nátıjeli boldy. Bul – Berlınaleden keıingi tanymal festıvál. Bıyl olar Qazaqstanmen tyǵyz qarym-qatynas ornatýdy josparlap otyr. Biz óz kezeginde mundaı shyǵarmashylyq tájirıbege daıynbyz», - deıdi Sh. Aımanov atyndaǵy «Qazaqfılm» AQ halyqaralyq bóliminiń menedjeri Aıjan Qasymbekova.