Búgin Almatydaǵy Abaı atyndaǵy Qazaq ulttyq opera jáne balet teatrynda qazaq kınosy men teatr óneriniń ańyzy, kórnekti óner qaıratkeri Asanáli Áshimovti aqtyq saparǵa shyǵaryp salý rásimi ótti, - dep habarlaıdy aqshamnews.kz tilshisi.
Óner ıesimen qoshtasýǵa qalyń jurtshylyq jınaldy, olardyń qatarynda elge tanymal tulǵalar da bar.
Memlekettik keńesshi Erlan Qarın Asanáli Áshimovtiń otbasy men jaqyndaryna kóńil aıtty.
"Qazaqstannyń Eńbek Eri Asanáli Áshimovtiń otbasy men jaqyndaryna qaıǵylaryńyzǵa ortaqtasyp, kóńil aıtamyn. Asanáli Áshimov búkil sanaly ǵumyryn teatr men kıno ónerine arnap, ulttyq mádenıetimizdiń kókjıegin keńeıtýge ólsheýsiz úles qosty. Ol kóptegen obrazdy sheber somdap, kórermenniń ystyq yqylasyna bólendi. Sahna sańlaǵy ári kásibı kınoger retinde sońyna óshpes iz qaldyrdy. Jas ónerpazdarǵa baǵyt-baǵdar berip, rýhanı sabaqtastyqtyń saqtalýyna zor eńbek sińirdi. Ónerdiń týyn bıik ustap, ónegeli ǵumyr keshken Asanáli Áshimovtiń jarqyn beınesi halqymyzdyń júreginde máńgi saqtalady. Imany salamat, jany jánnatta bolsyn!" - dedi ol.
Eske salaıyq, qazaq kınosynyń korıfeıi, Qazaqstannyń halyq ártisi, Qazaqstannyń Eńbek Eri Asanáli Áshimov 21 jeltoqsanda 89-ǵa qaraǵan shaǵynda ómirden ozdy.