Búgin, 23 jeltoqsanda Almatydaǵy Abaı atyndaǵy Qazaq ulttyq opera jáne balet teatrynda qazaq kınosy men teatr óneriniń ańyzy, kórnekti óner qaıratkeri Asanáli Áshimovti aqtyq saparǵa shyǵaryp salý rásimi ótti, - dep habarlaıdy aqshamnews.kz tilshisi.
Óner ıesimen qoshtasýǵa qalyń jurtshylyq jınaldy, olardyń qatarynda elge tanymal tulǵalar da bar. Olar abyzǵa aınalǵan qazaq óneriniń qara narynyń estelikterin aýyr kúrsinispen eske alyp, sóz sóıledi.
Qymbat Ábildına:
"Taý tulǵasymen halyq bolatyn. Sol halyqtyń basyna qýanysh ornasa da, qaıǵy ornasa da, "halyq kim?" degende dosqa da, dushpanǵa da, oqyǵanǵa da, oqymaǵanǵa da, qalalyqqa da, dalalyqqa da taısalmaı kórsetetin, taý qylyp tanytatyn sırek tulǵa edi. Búgin biz sol tulǵadan aıyrylyp turmyz. Júregim qatty aýyryp tur. "Qazaq degen kim?" dep suraǵanda, Asanáli aǵany uıalmaı, maqtanyshpen kórsete alatyn edik. Ol - keshegi ǵasyrdyń da, búgingi ǵasyrdyń da bet-beınesi, bedeli, búkil qazaqtyń tólqujaty boldy", - dedi ol qoshtasý rásiminde.
Saýyq Jaqanova:
"Qanshama uly tulǵalarymyz ómirden ótip jatyr. Sonyń sońy bolsyn dep tileıik, ózgeleri aman bolsyn. Asanáli aǵamyzdyń rýhyna ımany joldas bolsyn, jatqan jeri jaıly bolsyn. Eli aman, jurty tynysh bolsyn. Asanáli aǵadaı ul-qyzdar qazaqtan týa bersin", - dedi ol.
Smaǵul Elýbaı:
"Ekranda ol halyqtyń batyr tulǵasyn, asyl azamattyń beınesin somdady. Búgin Asanáli aǵa jasaǵan sol beınelerge razy bolǵan qazaq halqynyń qabyrǵasy qaıysyp otyr. Jatqan jeri jaıly, topyraǵy torqa bolsyn", - dedi jazýshy.
Baqyt Bedelhan:
"Búgin taý qulap, báıterek synyp túskendeı. Aspan alasaryp, búkil qalyń qazaq qaıǵyryp, qabyrǵasy sógilip, kóz jasy tógilip otyr. Joqtan bar jasaıtyn - Qudaı, ólgendi tiriltetin - óner. Sol ólgen ónerdi tiriltip, órge súırep, búkil Alashtyń batasyn alyp, aqyry ózi abyzǵa aınalǵan jasqa keldi. Qazaqtyń búkil ónerin, rýhyn, qasıetin, bar bolmysyn álemge tanytty. Asanáli aǵam ózi: "Ulylardyń bári túsime kiredi, saǵynamyn. Meniń bul dúnıedegi qatarym azaıdy, o dúnıedegi dostarym kóp" dep jıi aıtatyn. Taǵy birde: "Eshkimdi áýrege salmaı, ózim de qınalmaı, uıyqtap ketsem armanym joq" deıtin. Sol armanyna jetti. Muny qazaq "aq ólim" deıdi. Búkil qazaqtyń alaqanynda turyp, aq ólimmen ketý - úlken baqyt shyǵar dep oılaımyn. Asekeńniń ómiri - ónege, taǵdyry - taǵylym, ǵumyry - ǵıbrat bolýǵa tıis", - deıdi aqyn.
Eske salaıyq, qazaq kınosynyń korıfeıi, Qazaqstannyń halyq ártisi, Qazaqstannyń Eńbek Eri Asanáli Áshimov 21 jeltoqsanda 89-ǵa qaraǵan shaǵynda ómirden ozdy.