Almaty qalasynyń ákimi Darhan Satybaldynyń tóraǵalyǵymen jańa jyldaǵy mereke kúnderi qala tirshiligin úzdiksiz qamtamasyz etýge jaýapty komýnaldyq jáne apattyq qyzmetterdiń daıyndyǵyna arnalǵan keńes ótti. Keńeste sanıtarlyq jaǵdaı, turǵyn úı qorynyń, ınjenerlik jeliler men jedelsaty sharýashylyǵynyń turaqty jumysy máselelerine erekshe nazar aýdaryldy.
Mereke kúnderi komýnaldyq qyzmetterdiń jumysy kúsheıtiledi. 31 jeltoqsan men 4 qańtar aralyǵynda merdiger uıymdar men mamandandyrylǵan mobıldi brıgadalardy tarta otyryp, táýlik boıy kezekshilik uıymdastyrylady. 1 qańtarǵa qaraǵan túni qalanyń alańdarynda, qoǵamdyq keńistikterde, saıabaqtarda, skverlerde, aýlalarda jáne adamdar kóp jınalatyn oryndarda, onyń ishinde jańa jyldyq shyrsha ornatylǵan aýmaqtarda, saýda-oıyn-saýyq ortalyqtary men bazarlarda keshendi tazalaý jumystary júrgiziledi.
Kóshe-jol jelisin, aýla aýmaqtaryn, saıabaqtar men júrginshiler aımaqtaryn kútip ustaýǵa 2,7 myńnan astam jol jumysshysy jáne 1 myńnan asa arnaıy tehnıka jumyldyrylady. Aýa raıy qolaısyz bolǵan jaǵdaıda tehnıka men adam resýrstaryn qosymsha tartý kózdelgen. Qoqys jáshikteri men konteıner alańdarynyń ýaqytyly tazalanýy, sondaı-aq turmystyq qatty qaldyqtardyń shyǵarylýy qatań baqylaýǵa alynady.
Turǵyn úı qorynyń turaqty jumysyn qamtamasyz etý úshin sý, jylý jáne elektr energıasynyń berilýin baqylaıtyn, apattyq qyzmetterdiń jumysyn úılestiretin jáne turǵyndardyń ótinishterin jedel qaraıtyn táýlik boıǵy jedel áreket etý shtaby uıymdastyryldy. Basqarýshy uıymdarmen ózara is-qımyl qalanyń barlyq aýdandarynda, onyń ishinde jumys chattary arqyly jolǵa qoıylǵan. Mereke kúnderi apattyq brıgadalardyń kezekshiligi kúsheıtilip, jedelsaty sharýashylyǵynyń dıspecherlik qyzmetteri táýlik boıy jumys isteıdi.
Keńes qorytyndysy boıynsha qala ákimi salalyq basqarmalar men merdiger uıymdar basshylarynyń atqarylatyn jumystardyń sapasy men ýaqtyly oryndalýyna jeke jaýapkershiligin atap ótip, jańa jyldaǵy mereke kúnderi komýnaldyq qyzmetterdiń barynsha daıyn bolýyn jáne barlyq shtattan tys jaǵdaılarǵa jedel áreket etýdi qamtamasyz etýdi tapsyrdy.