Qazaqstandyqtardyń arasyndaǵy eń joǵary tabys Qaraǵandy oblysynda tírkelgen, dep habarlaıdy aqshamnews.kz
Bírínshí kredıttík byuro sarapshylarynyń málímetínshe, úshínshí toqsannyń qorytyndysy boıynsha Qaraǵandy oblysynda eń auqatty 10% tūrǵyn jan basyna shaqqanda aıyna orta eseppen 413 myń teńge tabys tapqan. Būl – respublıkalyq ortasha kórsetkíshten 1,5 ese joǵary árí eldíń ózge óńírleríndegí deńgeıden de asyp túsedí.
Statıstıka halyqty 10 teń topqa bóledí – eń kedeılerden eń auqattylarǵa deıín. Áńgíme dál osy joǵarǵy 10% turaly bolyp otyr. Mūndaǵy «baılyq» shartty ūǵym: jaz-kúz aılarynda būl topqa enu úshín aıyna kemínde 189 myń teńge tabys jetkílíktí bolǵan. Al osy sanattaǵy eń joǵary tabys 1,9 mln teńgege deıín jetken.
Qaraǵandy oblysy 2022 jyly esepteu ádístemesí ózgergennen berí alǵash ret «baılardyń» tabysy boıynsha kósh bastady. Būǵan deıín óńír tūraqty túrde alǵashqy bestíkke engenímen, mūndaı joǵary kórsetkíshter tírkelmegen – būryn būl toptaǵy ortasha tabys shamamen 296 myń teńge deńgeıínde bolǵan. Sarapshylar tabystyń kúrt ósuí íríkteu erekshelíkterímen baılanysty boluy múmkín ekenín joqqa shyǵarmaıdy. Tabys kórsetkíshterí 12 myń úı sharuashylyǵyna júrgízílgen saualnama negízínde esepteledí, būl joly Qaraǵandy oblysynda ádettegíden kóp auqatty respondent qamtylǵan boluy yqtımal.
Ekínshí orynda – Pavlodar oblysy: aıyna 360,8 myń teńge. Bír jyl būryn kósh bastaǵan Astana úshínshí orynǵa syrǵydy – 353,3 myń teńge (būryn 480 myń teńge bolǵan). Almaty tórtínshí orynda – 336,2 myń teńge.
Mūnyń alańdatarlyq qyry da bar. Qaraǵandy oblysynda auqatty tūrǵyndardyń tabysy eń kedeılerge qaraǵanda 6,7 ese joǵary. Mūnan da úlken aıyrmashylyq tek Pavlodar oblysynda baıqalady – shamamen jetí ese. El boıynsha orta eseppen «baılar» «kedeılerden» alty ese kóp tabys tabady.
