Úkimet otyrysynda Premer-mınıstr Oljas Bektenov shaǵyn bıznesti qoldaýdyń jáne kásipkerler úshin múmkindikterdi keńeıtýdiń mańyzdylyǵyn atap ótti, dep habarlaıdy aqshamnews.kz
«Shaǵyn bıznestiń óndiristik ınfraqurylymǵa qoljetimdiligin qamtamasyz etip, úı-jaılardy jeńildikpen jalǵa alýyna múmkindik jasaǵan jón. Sonymen qatar shaǵyn bıznesti qoldaýdyń óńirlik baǵdarlamalaryn ázirleý mańyzdy is ekenin atap ótkim keledi», dedi Oljas Bektenov.
Máselen, Almaty qalasynda kásipkerlikti damytý baǵdarlamasy aıasynda bıyl jergilikti búdjetten shaǵyn jáne orta bıznesti damytýǵa 25,5 mlrd teńge bólindi. Bul jalpy memlekettik qoldaý sharalarymen qamtylmaǵan, qala úshin neǵurlym basym baǵyttardyń damýyn yntalandyrýǵa múmkindik berdi.
Tabysty mysaldardyń biri retinde qalada jyldyq 6%-ǵa deıin jeńildikti nesıeler berý arqyly shaǵyn ónerkásiptik parkterdi damytý isin aıtýǵa bolady.
Osy oń tájirıbeni búkil elimiz boıynsha keńinen taratý qajettiligi atap ótildi.
Budan bólek, Úkimette «İsker aımaq» baǵdarlamasyn qarjylandyrý tetikteri aıqyndaldy.
Qarjy mınıstrligine Baǵdarlamany qarjylandyrýdy qamtamasyz etý tapsyryldy, bul rette Baǵdarlamany jergilikti búdjetter esebinen de qosa qarjylandyrý kózdelýi qajet. Óńir ákimdikteri birinshi deńgeıdegi sýbsıdıalardy bólý úshin aýdandardyń ereksheligin eskere otyryp, barynsha qysqa merzimde basym salalardyń tizbesin qalyptastyrýy qajet.