"Nazar aýdaryńyz! Qaýipti júk" profılaktıkalyq is - sharasy aıasynda 7,5 mln. teńge aıyppul óndirildi.
Aksıa bastalǵaly beri 50 tasymaldaýshyǵa qaýipti júkterdi tasymaldaý erejelerin buzǵany úshin aıyppul salyndy, dep habarlaıdy aqshamnews.kz.
Kólik mınıstrliginiń aqparatyna saı, reıdtik is-sharalar Almaty, Aqtóbe jáne Batys Qazaqstan óńirlerinde ótkizildi. Tamyz aıynyń sońyna deıin aksıa elimizdiń basqa oblystarynda da ótedi.
Bul is-shara Kólik mınıstrligi Avtomobıl kóligi jáne kóliktik baqylaý komıtetiniń bastamasymen júrgizilýde.
Aksıanyń maqsaty — qaýipti júkterdi tasymaldaý qaýipsizdigin qamtamasyz etý jáne qaýipti júkterdi tasymaldaýdy júzege asyratyn jeke jáne zańdy tulǵalardyń Qazaqstan Respýblıkasynyń kólik zańnamasyn saqtaýyn qadaǵalaý.
Inspektorlar tirkeý qujattarynyń, jol paraqtarynyń, júrgizýshige arnalǵan nusqaýlyqtardyń, qaýipti júkterdi tasymaldaýǵa ruqsat beretin kýáliktiń bolýyn tekseredi.
Esterińizge sala keteıik, "Avtomobıl kóligi týraly" QR Zańyna sáıkes tasymaldaý, tıeý-túsirý jumystaryn júrgizý jáne saqtaý kezinde olarǵa tán erekshelikterge baılanysty tehnıkalyq quraldardyń, qurylǵylardyń, ǵımarattar men qurylystardyń jarylýyna, órtenýine nemese búlinýine, sondaı-aq adamdardyń, janýarlardyń ólim-jitimine, jaraqat alýyna jáne aýrýyna sebep bolýy, qorshaǵan tabıǵı ortaǵa zıan keltirýi múmkin kez kelgen zattar, materıaldar, buıymdar, óndiristik jáne ózge de qyzmet qaldyqtary qaýipti júkter dep tanylady.