Bıyl Qazaqstan Qarýly Kúshteriniń qurylǵanyna - 30 jyl
Prezıdent Qasym-Jomart Toqaev saltanatty rásimge qatysýshylardy Otan qorǵaýshy kúnimen jáne Jeńis meıramymen quttyqtap, elimizdiń qaýipsizdigin qamtamasyz etý isindegi áskerı qyzmetshiler men arnaýly memlekettik organdar qyzmetkerleriniń úlesin erekshe atap ótti, dep habarlaıdy Almaty-aksamy.kz Aqordaǵa silteme jasap.
"Bıyl Qazaqstan Qarýly Kúshteriniń qurylǵanyna 30 jyl tolyp otyr. Osy kezeńde áskerimiz aıbyndy armıaǵa aınaldy. Qyraǵy jaýyngerlerimiz el shebin qas qaqpaı kúzetip tur. Olar memlekettigimizdi nyǵaıtýǵa zor eńbek sińirýde. Qarýly Kúshterimiz – Táýelsizdiktiń myzǵymas tuǵyry, eldiktiń berik qalqany", – dedi Memleket basshysy.
Prezıdent jaqsy jabdyqtalǵan zamanaýı armıa memlekettiligimizdiń berik qorǵany ekenin aıtty.
"Geosaıası turaqsyzdyq, jańa syn-tegeýrinder men qaýip-qaterler jaǵdaıynda biz ulttyq múddemizdi qorǵaýǵa, memleketimizdiń egemendigi men aýmaqtyq tutastyǵyn saqtaýǵa daıyn bolýymyz kerek. Sondyqtan qorǵanys áleýetin nyǵaıtý árdaıym bizdiń mańyzdy basymdyǵymyz bolady", – dedi Qasym-Jomart Toqaev.
Memleket basshysy kúshtik organdarda qyzmet etýdiń abyroıly mısıa jáne úlken jaýapkershilik ekenin atap ótti. Onyń aıtýynsha, Qazaqstan Qarýly Kúshteriniń sarbazdary men sardarlary ózderiniń eptilikteri men qabiletterin turaqty túrde shyńdaı otyryp, ozyq jaýyngerlik sheberlikterin kórsetip keledi.
Prezıdent Ekinshi Dúnıejúzilik soǵysta 500-ge jýyq jerlesimiz Keńes Odaǵynyń batyry atanǵanyn, biraq kóptegen maıdangerimizdiń erlikteri túrli sebepterge baılanysty eleýsiz qalǵanyn eske saldy.
Qasym-Jomart Toqaev jıynǵa qatysýshy ofıserlerge aty ańyzǵa aınalǵan úsh erjúrek jaýyngerdiń eren erligi týraly aıtty. Bul maıdangerlerge qaza bolǵannan keıin búgin «Halyq qaharmany» ataǵy berildi.
"Birinshisi – ataqty mergen Tóleýǵalı Ábdibekov. Ol bir ózi maıdan dalasynda 397 jaýdyń kózin joıǵan. Bul erlik tıisti qujattarmen dáleldengen. Qazaqtyń qaharman uly qaza tapqannan keıin Keńes Odaǵynyń Batyry ataǵyna usynylǵan. Biraq, erligi eskerýsiz qaldy. Kapıtan Aleksandr Nesmıanov ta erekshe erlik pen qaharmandyq kórsetti. Ol boraǵan oqqa qaramastan, orda bekingen búkil batalóndy ózimen birge shabýylǵa kóterdi. Jaý qorǵanysyn birinshi bolyp buzǵan Nesmıanov jaýdyń 20 jaýyngerimen jalǵyz alysyp, 13-iniń kózin joıǵan. Qalǵanyn bas saýǵalaýǵa májbúr etti. Kezekti urysta ol jaý shebiniń tylyna ótip, basty qaýipti ózine burdy, sóıtip jaýdyń qorǵanys shebin serikteriniń buzyp ótýine múmkindik jasady. Al rotanyń eki komandıri jaralanǵan soń, basshylyqty óz qolyna aldy. Aleksandr Nesmıanov úsh ret Keńes Odaǵynyń Batyry ataǵyna usynyldy, biraq, ár kez oǵan ádiletsizdik jasalyp, eleýsiz qaldy. Jerlesimiz Ybyraıym Súleımenov te quralaıdy kózge atqan naǵyz mergen bolǵan. Ol bir jyldyń ishinde 289 jaý áskerin joıdy. Bul erlik te tarıhı derekterde kórsetilgen. Qazaqtyń qaharman qyzy Mánshúk Mámetova ekeýi sońǵy demi qalǵansha jaýmen arpalysyp, qaza tapty. Batyr ataǵyna ekeýi qatar usynylǵanymen, Ybyraıym Súleımenovtiń erligi joǵary deńgeıde baǵalanbady", – dedi Prezıdent.
Qasym-Jomart Toqaev saltanatty is-sharaǵa qatysqan Tóleýǵalı Ábdibekov pen Ybyraıym Súleımenovtiń týystaryna Halyq qaharmanynyń erekshelik belgisi «Altyn juldyz» ben «Otan» ordenin tabystady. Al Aleksandr Nesmıanovtyń nagradasy mýzeı tórinen oryn alady.
"Tóleýǵalı Ábdibekovtiń týysy Aıgúl Kemelbaeva Qasym-Jomart Toqaevqa jáne dańqty atasynyń atyn máńgi este saqtaýǵa atsalysqan jaýapty tulǵalardyń bárine alǵysyn aıtty. Ybyraıym Súleımenovtiń qaryndasy Aıtkúl Súleımenova Memleket basshysyna shyn júrekten alǵys bildirdi. Sondaı-aq Prezıdentke zor densaýlyq tilep, Jańa Qazaqstandy qurý isinde tabysqa jetýine nıettestik bildirdi jáne sózin "Biz Sizge senemiz", – dep aıaqtady.
Bul – shyn máninde, tarıhı ádildiktiń saltanat qurýy. Biz erlerimizdiń esimin jańǵyrtyp, olardy ulyqtaı beretin bolamyz. Óıtkeni, erlik eshqashan eskirmeıdi. Maıdanger aǵa býyn keıingi urpaqqa árdaıym úlgi-ónege, – dedi Memleket basshysy.
Sóziniń sońynda Qasym-Jomart Toqaev memleketimizdiń tutastyǵy men qaýipsizdigin qorǵap júrgen elimizdiń barsha azamatyna alǵys aıtty.
Budan keıin Prezıdent memlekettik nagradalardy tabystap, ofıserlerge áskerı jáne arnaýly ataqtar, synyptyq shender berdi.