Bas pedagog kezdesýde "bolashaqtyqtardy" qyzyqtyrǵan túrli suraqqa jaýap berdi.
Jıynda nazarǵa alatyn qyzyqty usynystar da aıtyldy. Kezdesý týraly mınıstr óziniń Telegram-daǵy kanalynda jazdy, dep habarlaıdy Almaty-akshamy.kz
Bilim jáne ǵylym mınıstri Asqat Aımaǵambetov «Bolashaq» baǵdarlamasynyń túlekterimen jıynda baǵdarlamany odan ári jetildirý jáne qaıta baǵdarlaý, qazirgi stıpendıattardyń tańdaýy kóbirek bolýy úshin elderdiń geografıasy men ýnıversıtetter sanyn keńeıtý týraly aıtty
«Sonymen qatar sheteldik úzdik oqý oryndarynda bilim alyp, búginde otandastaryna paıdasyn tıgizip, el damýyna mańyzdy úles qosyp júrgen túlekterdiń áńgimesin tyńdaý da qyzyq boldy. Mysaly, Dıana Mombaeva Kanadanyń jetekshi joǵary oqý oryndarynyń biri Kalgarı ýnıversıtetinde «Bolashaq» baǵdarlamasy boıynsha bilim alyp, keıin Qostanaı oblysyndaǵy týǵan aýyly Komsomolǵa oraldy. Ol qazir aýyldyq mektepte tarıh páninen sabaq beredi. Sonymen birge Dıana balalarǵa aǵylshyn tilin de tegin úıretedi. Jas pedagog Kanadadan alǵan biliminiń arqasynda aýylda turýǵa jáne de aýyldastarynyń ómirin jaqsartý maqsatynda qaıta oralýǵa bolatynyn balalardyń ózine qarap, túsingenin qalaıtynyn aıtty», - dep jazdy mınıstr.
Al kezdesýge qatysqan taǵy bir «Bolashaq» túlegi, mammoradıolog dáriger Danara Súleımenova Ulybrıtanıa ýnıversıtetinde bilim alyp, keıin «Bolashaq» baǵdarlamasy aıasynda AQSH ýnıversıtetinde taǵylymdamadan ótken. Dárigerdiń aıtýynsha, ol qazir sút bezderiniń sáýlelik dıagnostıkasynyń ártúrli ádisterin – ÝDZ, mammografıa, MRT-ny meńgergen jáne qajet bolǵan jaǵdaıda tıisti dıagnostıkalyq manıpýlásıany taǵaıyndap, oryndaıdy.
Búginde qazaqstandyq mektepterde «Bolashaqtyń» arqasynda álemniń jetekshi ýnıversıtetterinde bilim alǵan 800-den astam muǵalim oqýshylardy oqytyp jatyr. 600-den astam dáriger jyl saıyn otandastarymyzdyń ómiri men densaýlyǵyn saqtap qalý úshin on myńdaǵan ota jasaıdy.
«Árıne, «Bolashaq» baǵdarlamasy arqyly bilim alǵan pedagogterdiń, dárigerlerdiń jáne basqa da túrli mamandyq ókilderiniń eńbegi qoǵamymyz ben elimizge mańyzdy ári qajet. Biz «Bolashaq» baǵdarlamasyn jetildirýdi jalǵastyramyz», - dedi Asqat Aımaǵambetov.