QR Prezıdentiniń baspasóz hatshysy Berik Ýálıdiń aıýtynsha, Memleket basshysy Qasym-Jomart Toqaev 9 kúnde 26 Jarlyqqa qol qoıǵan. Bul týraly ol «Habar 24» telearnasyna bergen suhbatynda aıtty, dep habarlaıdy Almaty-akshamy.kz QazAqparatqa silteme jasap.
«Jańa jyl bastalǵaly 9 kún boldy ǵoı. Osy 9 kúnniń ishinde Prezıdent barlyǵy 26 Jarlyqqa qol qoıǵan eken, onyń 5-eýi taǵaıyndaý týraly. Sondaı-aq 9 Ókimge qol qoıǵan, onyń taǵy da 5-eýi taǵaıyndaý týraly. Sonda 10 taǵaıyndaýǵa qol qoıǵan. Sondaı-aq 3 qańtar kúni 3 tvıt qaldyrdy, 4 qańtar kúni 4 tvıt jazyp, halyqpen baılanysyp, tikeleı joldap otyrdy», - dedi Berik Ýálı.
Onyń aıtýynsha, munyń bári úlken jumys.
«Jalpy, munyń bári úlken jumystar. Bul jerde resmı saıtqa shyqqan aqparattardy ǵana aıtyp otyrmyn. Onyń syrtynda qanshama tıisti organdar esep berip jatyr. Ákimderdiń esebin alyp jatyr. Bylaısha aıtqanda, eshqandaı ýaqyt joq. Búkil eldegi ahýaldy tamyrshydaı dóp basyp, baqylap otyr», - dedi Prezıdenttiń baspasóz hatshysy.