Uldyń qyzmeti ana kózimen
Astanada Qorǵanys mınıstri, general-polkovnık Rýslan Jaqsylyqovtyń basshylyǵymen keńeıtilgen keńes ótti. Onda oqý jylynyń birinshi toqsanynyń qorytyndysy boıynsha zańdylyq, quqyqtyq tártiptiń jáne tárbıe jumysynyń jaı-kúıine qatysty máseleler qaraldy, dep habarlaıdy Almaty-akshamy.kz.
Keńeske qurylymdyq bólimshelerdiń basshylary, Qarýly kúshter túrleriniń bas qolbasshylary, ásker tekteriniń, óńirlik qolbasshylyqtardyń qolbasshylary, olardyń tárbıe jáne ıdeologıalyq jumys jónindegi orynbasarlary, bas serjant qatysty.
Qorǵanys mınıstrine «Ómirińdi saqta» baǵdarlamasyn iske asyrýdyń aralyq nátıjeleri, quqyqtyq tártiptiń jaı-kúıi, tárbıe jáne ıdeologıalyq jumys organdarynyń qyzmetin jetildirý, jeke quram arasyndaǵy jarǵydan tys qatynastardyń aldyn alý týraly baıandaldy.
Qorǵanys mınıstriniń orynbasary general-leıtenant Sultan Kamaletdınov óz sózinde jergilikti jerlerde «Ómirińdi saqta» vedomstvoaralyq baǵdarlamasynyń iske asyrylýynyń sapasyna nazar aýdardy. Atap aıtqanda, komandırlerdiń sarbazdardyń analar komıtetiniń ókilderimen tyǵyz qarym-qatynasyn jáne merzimdi boryshyn ótep júrgen áskerı qyzmetshilerdiń ata-analary kótergen máselelerge muqıat qaraýdy talap etetin «Uldyń qyzmeti ana kózimen» jobasy týraly boldy.
General-leıtenant Sultan Kamaletdınov quqyqbuzýshylyqtyń aldyn alýdyń pármendi quraly beınebaqylaý júıeleri ekenin atap ótti. Osyǵan baılanysty ol áskerı bólimder men bólimshelerdi jaraqtandyrý boıynsha biryńǵaı standartty, tehnıkalyq talaptar men quqyqtyq reglamentteýdi engizýdi jedeldetýdi usyndy.
Jıynda sonymen qatar, Áskerı polısıa bas basqarmasynyń jáne Tárbıe jáne ıdeologıalyq jumys departamentiniń bastyqtary polkovnık Rýslan Qulymbetov pen ádilet polkovnıgi Tileýhan Basqojaev, Qurlyq áskerleri bas qolbasshysynyń mindetin ýaqytsha atqarýshy general-maıor Qanysh Ábýbákirov baıandama jasady.
Keńeıtilgen keńestiń qorytyndysy boıynsha Qorǵanys mınıstri general-polkovnık Rýslan Jaqsylyqov quqyqtyq tártip pen áskerı tártipti nyǵaıtýǵa baǵyttalǵan birqatar tapsyrmalar berdi.
Eń aldymen, ol kadrlardy sapaly irikteý jáne ornalastyrý, shalǵaıdaǵy áskerı bólimderdegi áskerı qyzmetshilerdiń turmysyn uıymdastyrý jáne áleýmettik qamtamasyz etý qajettiligine nazar aýdardy. Mınıstrdiń nusqaýy boıynsha 2023 oqý jylynyń birinshi toqsanynyń qorytyndysyna qaraı quqyq buzýshylyqtardyń ósýine jol berilgen áskerı bólimder komandırleriniń atqaratyn laýazymdaryna sáıkestigi týraly másele de qaralatyn bolady.