Daıyndyq kezeńi oqý-materıaldyq bazany jańartý, ınfraqurylymǵa qyzmet kórsetý jáne polıgondardy jarylys qaýpi bar zattardan tazartý sharalaryn qamtıdy.
Qazirgi ýaqytta Qarýly Kúshterde el Prezıdenti – Joǵarǵy Bas qolbasshy Qasym-Jomart Toqaevtyń Qazaqstan armıasynyń jaýyngerlik qabiletin túbegeıli arttyrý jónindegi tapsyrmalary iske asyrylýda, dep habarlaıdy Almaty-akshamy.kz QR Qorǵanys mınıstrliginiń baspasóz qyzmetine silteme jasap.
Mamyr aıynyń sońyna deıin sozylatyn daıyndyq kezeńinde qarý-jaraq pen áskerı tehnıkany daıyndaý, oqý-materıaldyq bazaǵa qyzmet kórsetý jáne ony damytý sharalar kesheni ótkiziletin bolady.
Arnaıy qurylǵan komısıalar jazǵy oqý kezeńine daıyndyqty baqylaýdy júzege asyratyn bolady.
Jaýyngerlik daıarlyq prosesinde Qarýly Kúshterdegi áskerı qyzmetshilerdiń qaýipsizdigi men densaýlyǵyn saqtaý sharalaryn zerdeleý boıynsha teorıalyq jáne praktıkalyq sabaqtaryn ótkizý josparlanǵan. Osy ýaqytta qysqy oqý kezeńindegi jaýyngerlik daıarlyq is-sharalary barysynda alynǵan tájirıbeni eskere otyryp, jańa oqý jylyna basqarý organdaryn, quramalar men áskerı bólimderdi daıarlaý sharalaryn josparlaýǵa erekshe nazar aýdarylatyn bolady.
Daıyndyq kezeńi aıaqtalǵan soń Qazaqstan Qarýly kúshteri quramalary men áskerı bólimderiniń ázirligi qaralady.