Eýropada sońǵy 500 jylda bolmaǵan qýańshylyq saldarynan ózen-kólder keýip, jasyl jelek qýrap barady.
«Qart qurlyqtyń 17 paıyzy keýip qalýdyń aldynda tur», – deıdi mamandar.
Qazir Italıa, Ispanıa, Portýgalıa, Fransıa, Germanıa, Nıderland, Belgıa, Vengrıa, Rýmynıa, jalpy Eýropa aýmaǵynyń 47 paıyzy qýańshylyqtyń zardabyn tartyp otyrǵan kórinedi, dep habarlaıdy Almaty-akshamy.kz. Qazaqstan.tv saıtyna silteme jasap.
Shveısarıa men Fransıanyń shekarasyndaǵy Brene ózeni sýalǵan. Buryn onyń tereńdigi 18 metr bolatyn. Basqa da ózenderde sýdyń tartylýy kemelerdiń júrisin qıyndatty. Balyqtar qyrylyp jatyr. Ósimdikter, aǵashtar, egin qýrap barady.
Sharýalar bıyl sý tapshylyǵy, aptap ystyqtyń kesirinen júgeri men kúnbaǵystan alynatyn ónim 15-20 paıyzǵa azaıady dep dabyl qaǵýda. Ádette kúnniń kózine zárý bolatyn brıtandyqtar men belgıalyqtar endi jańbyr quısa dep tilep otyr.
Alaıda Eýropalyq komısıanyń ǵalymdary Jerorta teńiziniń Batys bóliginde aýa raıy qarashaǵa deıin qurǵaq, jyly bolady dep boljap otyr.