Mamandar ónimniń tapshylyǵy men baǵasynyń ósýine qazaqstandyqtardyń ózderi kináli dep otyr.
Energyprom.kz málimetinshe, qant baǵasy bir jyl ishinde 61%-ǵa ósken, dep habarlaıdy Almaty-akshamy.kz
Bıyl qańtar-sáýir aılaryndaǵy qant óndirisi 81,8 myń tonna boldy. Bul byltyrǵy sáıkes kezeńmen salystyrǵanda 2,1%-ǵa az. Qanttyń úshten ekisinen astamy Jambyl oblysynda óndiriledi, ıaǵnı 56,5 myń tonna.
«2022 jyldyń birinshi toqsanynyń qorytyndysy boıynsha, otandyq qant óndirýshiler suranysty 39%-ǵa qamtamasyz etti. Byltyrǵy kórsetkish - 43,8%. Birinshi toqsanda qazaqstandyq óndiris bir jylda birden 25,2%-ǵa tómendedi, ımport 9%-ǵa, 60,1 myń tonnaǵa deıin qysqardy», - delingen aqparatta.
Nátıjesinde 2022 jyldyń birinshi toqsanynda ishki naryqta 98,5 myń tonna qant satyldy. Bul bir jyl burynǵyǵa qaraǵanda 15,7%-ǵa az. Sektordaǵy eksport mardymsyz, ol 8 ese qysqardy. Bıyl qant buryn-sońdy bolmaǵan dúrbeleń týdyrdy. Máselen, naýryzda Reseıden qant eksportyna tyıym salynýyna baılanysty reseılik qant quny Qazaqstanda aqpanmen salystyrǵanda birden 34,3%-ǵa ósti.
Saýda jáne ıntegrasıa mınıstrligi Aýyl sharýashylyǵy mınıstrligimen birlesip, elde qant tapshylyǵy joq jáne qalǵan qory úsh aıǵa jetedi dep málimdedi. Sonymen qatar olar únemi tolyqtyrylyp otyratynyn aıtty, dep jazady Energyprom.kz.
Soǵan qaramastan, málimdeme jasalǵan ýaqytta túrli qala dúkenderinde sórelerde qant bolmady. Keıin alypsatarlyq jaǵdaılary anyqtaldy. Qant baǵasynyń ósýi kelesi aılarda da jalǵasty: sáýirde qant taǵy 4,5%-ke, mamyrda 5,7%-ke qymbattady. Nátıjesinde qanttyń jyldyq qymbattaýy birden 60,5% boldy.
Mamyr aıynda qant dúken sórelerinen qaıtadan joǵalyp ketti. Saýda jáne ıntegrasıa mınıstri Baqyt Sultanov eldegi qant tapshylyǵyn moıyndap, ony Reseı tarapynan qant eksportyna engizilgen tyıymmen baılanystyrdy.
Eske salsaq, jýyrda Aýyl sharýashylyǵy mınıstrligi elde qant tapshylyǵy joq ekenin, jetkizilim ýaqytynda júzege asyrylatynyn, al zaýyttar tolyq qýatynda jumys isteıtinin málimdegen edi.