Májilistiń jalpy otyrysynda Ulttyq ekonomıka mınıstri Álibek Qýantyrov qańtardaǵy tártipsizdikter kezinde zardap shekken kásipkerlerge qoldaý kórsetý sharalaryn túsindirdi, dep habarlaıdy Almaty-akshamy.kz QazAqparatqa silteme jasap.
«Memleket basshysy qańtar aıyndaǵy oqıǵalar barysynda keltirilgen zalaldy óteý, bızneske járdem kórsetý týraly tapsyrma berdi. Atalǵan jumys barysynda salyq salý máseleleri de bar. Sondyqtan alynǵan ótemaqy somasy boıynsha kásipkerlerdi salyq mindettemesinen bosatý maqsatynda osy máseleni retteý normalary usynylady», - dedi Á.Qýantyrov.
Sonymen qatar ol ınternet salasyndaǵy salyq salý júıesine qatysty usynysyn aıtty.
«Internetke qoljetimdilikti keńeıtý úshin jańa tehnologıalar kóbirek qoldanylyp jatar. Sonyń biri – geostasıonarlyq emes spýtnıktik baılanys júıeleri. Salyq kodeksinde osyndaı baılanys túri úshin 1 aılyq eseptik kórsetkish mólsherinde tólem belgileý usynylady», - dedi mınıstr.
Májilistiń osy jalpy otyrysynda Salyq kodeksine ózgerister engizý jónindegi qujatty qaraý kezinde elimizde paıdaly qazbalardy óndirý salyǵynyń kólemi artatyny aıtyldy.