Qazaqstan zańnamasynda balaǵat sózder úshin jaýapkershilik burynnan kózdelgen.
İİM Ákimshilik polısıasy komıteti basqarma bastyǵynyń mindetin atqarýshy Azamat Qurymbaev balaǵat sóz aıtqandarǵa qoldanylatyn jaza túrleri jaıynda suraqtarǵa jaýap berdi, dep habarlady Almaty-akshamy.kz Polisia.kz saıtyna silteme jasap.
Sońǵy kúnderi áleýmettik jelide balaǵat sóz úshin jaýapkershilik kúsheıdi degen áńgime kóbeıdi.
Azamat Qurymbaevtyń aıtýynsha, Qazaqstan zańnamasynda balaǵat sózder úshin jaýapkershilik burynnan kózdelgen. Mysaly, basqa adamnyń ar-namysy men qadir-qasıetin qorlaý –qylmys.
«Ol úshin 100 AEK-ke deıin aıyppul salý nemese 120 saǵatqa deıin túzeý, ıa bolmasa qoǵamdyq jumystarǵa tartý túrinde jaýapkershilik kózdelgen. Jaza sot arqyly eskertý nemese 5 táýlikke deıin qamaqqa alý túrinde bolýy múmkin», - deıdi ol.
Al qoǵamdyq oryndarda bylapyt sóıleý, jeke tulǵalarǵa qorlap tıisý, ǵımarattardy, ózge de qurylystardy, turǵyn úı-jaılardy buzý, ortaq paıdalanylatyn oryndardy, kóliktegi jáne ózge de qoǵamdyq oryndardaǵy múlikti búldirý jáne qoǵamdyq tártipti jáne jeke tulǵalardyń tynyshtyǵyn buzatyn basqa da osyndaı áreketter usaq buzaqylyqqa jatady.
Balaǵat sózder úshin jaýapkershilik qanshalyqty kúsheıdi?
«Iá, osy jyldan bastap usaq buzaqylyq jasaǵany úshin jaza kúsheıtiledi. Bul eń aldymen qoǵamdyq tártipti buzýdy boldyrmaý maqsatynda jasaldy. Qazir bireý qoǵamdyq orynda balalardyń nemese aǵa býyn adamdardyń kózinshe aınalasyndaǵylardy syılamaı, qoǵamdyq tártipti buzyp, balaǵat sóz aıtqan jaǵdaıda, bul úshin 17 250 teńge kóleminde aıyppul salynady nemese 10 táýlikke deıin qamaýǵa alynady», - deıdi basqarma basshysy.
Azamat Qurymbaev 6 naýryzdan bastap mundaı áreketter úshin 20 AEK (69 myń tenge túrindegi jaza) aıyppul salynatynyn nemese 5-ten 15 táýlikke deıin qamaýǵa alynatynyn atap ótti.
Eger bireý jaı ǵana «meni balaǵattady» dep aıtsa, aıyppul salyna ma?
Qurymbaevtyń aıtýynsha, árbir ótinish boıynsha polısıa qyzmetkerleri dáleldeme jınaıdy. Azamattardyń ótinishi, kýágerlerdiń aıǵaqtary, sondaı-aq quqyq buzýshylyqtyń aýdıo-, beınetúsirilimi, qajet bolǵan jaǵdaıda sarapshynyń qorytyndysy eskeriledi. Quqyqtyq baǵany sot beredi.
Jeke menshik úıinde, kóliginde balaǵattaǵany úshin jaza qarastyrylǵan ba?
Bári mán-jaıǵa baılanysty. Usaq buzaqylyq boıynsha jaýapkershilikke tartýǵa qoǵamdyq oryndarda balaǵat sóz aıtý, aınalasyndaǵylardy syılamaý, sondaı-aq qoǵamdyq tártip pen azamattardyń tynyshtyǵyn buzý mindetti shart bolyp sanalady.
Áleýmettik jelide balaǵat sóz aıtqandarǵa qalaı aıyppul salynady?
Azamat Qurymbaevtyń málimetinshe, áleýmettik jelilerde aıtylǵan balaǵat sóz qoǵamdyq oryndarda nemese aınalasyndaǵylarǵa syılamaýshylyq tanytyp, azamattardyń tynyshtyǵyn buzsa, ol úshin jaýapkershilik usaq buzaqylyq babymen qarastyrylady.
Qaı tildegi balaǵat sózderge aıyppul salynady?
Joǵaryda atalǵan jaǵdaılar bolǵan kezde qaı tilde bolsyn balaǵat sóz aıtqany úshin jaýapkershilik týyndaıdy.