Nur-Sultan qalasy prokýratýrasynyń vedomstvoaralyq jedel tergeý toby Nur-Sultan qalasy ákiminiń burynǵy orynbasary Q.T. Sultanbekovke, «Astana LRT» JSHS basqarma tóraǵasy bolǵan T.N. Ardanǵa jáne basqa da tulǵalarǵa qatysty «Astana qalasynyń jańa kólik júıesi» LRT, BRT/ITS jobasyn iske asyrýǵa bólingen búdjet qarajatyn jymqyrý faktisi boıynsha qylmystyq isti tergep jatyr, dep habarlaıdy Almaty-akshamy.kz QazAqparatqa silteme jasap.
Quzyrly organnyń málimetinshe, tergeý barysynda jınalǵan dáleldemeler kúdikti Q.T. Sultanbekovtiń áreketterin saralaýǵa múmkindik týyndaǵan.
Iaǵnı oǵan QR Qylmystyq kodeksiniń 1997 jylǵy redaksıasyndaǵy (budan ári - QK) 176-baby (uıymdasqan top quramyndaǵy qyzmet jaǵdaıyn paıdalana otyryp, asa iri mólsherde búdjet qarajatyn birneshe ret urlaý), 235-baby (birneshe qylmys jasaý maqsatynda uıymdasqan top qurý jáne ony basqarý) jáne qoldanystaǵy QK-niń 189-baby (uıymdasqan top quramyndaǵy qyzmet jaǵdaıyn paıdalana otyryp, asa iri mólsherde búdjet qarajatyn birneshe ret urlaý) boıynsha aıyp taǵylmaq. Al T.N. Ardannyń zańsyz áreketteri 1997 jylǵy Qylmystyq kodekstiń 176-baby (uıymdasqan top quramynda qyzmet babyn paıdalana otyryp, asa iri mólsherde búdjet qarajatyn birneshe ret urlaý), 262-baby (qyzmet babyn paıdalana otyryp, uıymdasqan qylmystyq topqa qatysý) jáne 189-baby (uıymdasqan top quramynda qyzmet babyn paıdalana otyryp, asa iri mólsherde búdjet qarajatyn birneshe ret urlaý) boıynsha saralanǵan.
QR Qylmystyq is júrgizý kodeksiniń (budan ári-QİJK) 206-babynyń 1-bóligine sáıkes, kúdiktiniń is-áreketin saralaý týraly qaýly shyǵarylǵan kezden bastap jıyrma tórt saǵattan keshiktirilmeı jarıalanady. Kúdikti nemese onyń qorǵaýshysy kelmegen jaǵdaıda qaýly jıyrma tórt saǵat ótkennen keıin de jarıalanýy múmkin.
Kúdikti delinip otyrǵan Q.T. Sultanbekov pen T.N. Ardannyń Qazaqstan Respýblıkasy aýmaǵynanan tys jerde bolýyna jáne kelýden jaltarýyna baılanysty qala prokýratýrasy QİJK-niń 206-babynyń 8-bóligin basshylyqqa ala otyryp, prokýrordyń kelisimimen olarǵa taǵylatyn aıypty buqaralyq aqparat quraldarynda jarıalap otyr. Qaýlylardy jarıalaýǵa jáne qajetti tergeý is-áreketterin júrgizýge qatysý úshin kúdikti Q.T. Sultanbekov pen T.N. Ardan Nur-Sultan qalasy prokýratýrasynyń Nur-Sultan qalasy Qabanbaı batyr dańǵylyndaǵy ákimshilik ǵımaratyna kelýi qajet. Kúdiktiler tergeý áreketterine qatysý úshin qorǵaýshyny óz betinshe shaqyrýǵa ne qylmystyq prosesti júrgizetin organnan qorǵaýshy suraýǵa quqyly (QR QİJK-niń 68-baby). Eger qorǵaýshyny kúdiktiler nemese olardyń zańdy ókilderi, sondaı-aq olardyń tapsyrmalary boıynsha basqa da adamdar shaqyrmasa, qorǵaýshynyń qatysýyn qylmystyq prosesti júrgizetin organ qamtamasyz etedi (QR QİJK-niń 67-baby).
Kúdiktiniń tergeýge belgilengen merzimde kelýine kedergi keltiretin sebepter bolsa, sondaı-aq, kúdiktiniń nemese olardyń múddelerin belgilengen tártippen qorǵaıtyn adamdardyń prokýrordan nemese sotqa deıingi is júrgizýdi júzege asyratyn adamnan qorǵaýshynyń qatysýyn qamtamasyz etýi týraly ótinishhatty málimdeý týraly nıeti bolsa, qylmystyq qýdalaý organyn aldyn ala habardar etýi qajet.
Buǵan deıin kúdiktiler Q.T.Sultanbekov pen T.N. Ardandy Nur-Sultan qalasynyń prokýratýrasy jaýap alý úshin bıylǵy 12 qańtarǵaa shaqyrtqan. Alaıda olar belgilengen ýaqytta kelmegen jáne kelýge kedergi keltiretin sebepter týraly habarlamaǵan.