Prezıdenttiń pikirinshe, yntymaqty, zańdylyqty jáne jaýapkershilikti minsiz saqtaý mańyzdy.
Qasym-Jomart Toqaev Ekonomıkalyq resýrstardyń zańsyz shoǵyrlanýyna qarsy is-qımyl máseleleri jónindegi vedomstvoaralyq komısıanyń otyrysyn ótkizdi, dep habarlaıdy Almaty-akshamy.kz Aqordaǵa silteme jasap.
Prezıdent jıynǵa qatysýshylar aldynda sóılegen sózinde halyqtyń Konstıtýsıaǵa engiziletin túzetýlerdi referendýmda qabyldaǵanyn jáne onyń zańdy túrde kúshine engenin atap ótti. Osylaısha, azamattarymyz Jańa, Ádiletti Qazaqstan qurýdy qoldady.
«Referendým aýqymdy jańǵyrtýlardy jalǵastyrýǵa jol ashty. Biz eldiń úmitin jáne senimin aqtaýǵa tıispiz. Barlyq salada bárine birdeı múmkindik beriletin qoǵam qurýymyz qajet. Turǵyndar ekonomıkalyq ósimniń ıgiligin shyn máninde kórýi kerek. Memlekettiń baılyǵy belgili bir adamdarǵa emes, barsha halyqqa tıesili. Sondyqtan, búkil halyqtyń ál-aýqatyn arttyrý – aldymyzda turǵan asa mańyzdy mindet», – dedi Prezıdent.
Memleket basshysy ekonomıka salasyn tártipke keltirip, túsinikti ári ádil oıyn erejesin bekitý qajet dep sanaıdy. Onyń aıtýynsha, bul baǵytta qordalanǵan problemalar men olqylyqtar bar.
Qasym-Jomart Toqaev Jańa Qazaqstanda ekonomıkalyq damýdyń basty qaǵıdaty tabystyń ádil bólinýi jáne azamattardyń turmys sapasyn arttyrý bolýǵa tıis ekenin atap ótti.
«Jýyrda meniń Jarlyǵymmen ekonomıkalyq resýrstardyń zańsyz shoǵyrlanýyna qarsy komısıa quryldy. Bul komısıa zańsyz jylystatylǵan qarajatty elge qaıtarýmen aınalysady. Onyń jumysy udaıy qoǵam nazarynda bolady. Halyq bizden bos ýáde emes, naqty nátıje kútedi», – dedi Prezıdent.
Prezıdenttiń pikirinshe, yntymaqty, zańdylyqty jáne jaýapkershilikti minsiz saqtaý mańyzdy.
«Barlyq is-áreket quqyqtyq normalarǵa tolyq saı bolýǵa jáne zańǵa qatań ári múltiksiz negizdelýge tıis. Prokýratýra qadaǵalaýshy organ retinde qabyldanatyn barlyq rásimderdiń zańǵa tolyqtaı sáıkes kelýin qamtamasyz etýge mindetti. Bul máselede qatelesýge jáne biliksizdik tanytýǵa bolmaıdy», – dedi Qasym-Jomart Toqaev.
Sonymen qatar Memleket basshysy vedomstvoaralyq komısıany belsendi ári nátıjeli jumys isteýge shaqyrdy.
«Komısıa jumysynyń nátıjesi naqty ári sapaly bolýy kerek», – dedi Qasym-Jomart Toqaev.
Memleket basshysynyń aıtýynsha, elimizden zańsyz shyǵarylǵan kapıtaldy barlyq zańdy rásimderdi saqtaı otyryp qaıtarý úshin belgili bir ýaqyt kerek ekenin túsiný qajet.
Qasym-Jomart Toqaevtyń pikirinshe, basty maqsat sotqa berilgen qylmystyq isterdiń sany emes, ekonomıkany naqty saýyqtyrý.
Prezıdent komısıanyń qyzmeti jóninde jurtshylyqqa júıeli túrde habar taratyp otyrýdy tapsyrdy.
«Bizdiń maqsatymyz – aıqyn. Halyqtan urlanǵan aktıvterdi elge qaıtaryp, ádildik ornatýymyz kerek. Qazir, eń bastysy, jumysty tıimdi uıymdastyrý qajet. Komısıa músheleri osy mindetti abyroımen atqarady dep senemin. Prezıdent Ákimshiligi barlyq jumysty baqylaýda ustaıdy», – dedi Memleket basshysy.
Sonymen qatar jıynda Premer-mınıstr Álıhan Smaıylov jáne Bas prokýror Berik Asylov baıandama jasady.