Uıym qyzmetiniń negizgi aspektileri qarastyryldy.
Memleket basshysy Qazaqstanǵa alǵash ret resmı saparmen kelgen Shanhaı yntymaqtastyq uıymynyń Bas hatshysy Chjan Mındi qabyldady, dep habarlaıdy Almaty-akshamy.kz Aqordaǵa silteme jasap.
Kezdesýde aımaqtyq qaýipsizdikti qamtamasyz etý, saýda-ekonomıkalyq jáne mádenı-gýmanıtarlyq baılanystardy nyǵaıtý sıaqty basym baǵyttar boıynsha Qazaqstannyń Shanhaı yntymaqtastyq uıymymen aradaǵy yqpaldastyǵyna qatysty máseleler talqylandy. Sondaı-aq qazirgi geosaıası jaǵdaıdaǵy Uıym qyzmetiniń negizgi aspektileri qarastyryldy.
Qasym-Jomart Toqaev Chjan Mınge iltıpat bildire otyryp, onyń SHYU-nyń Bas hatshysy qyzmetine geosaıası ahýaldyń kúrdeli jaǵdaıynda, ıaǵnı Uıymnyń erekshe ról atqaratyn kezinde kiriskenin atap ótti.
«Qazaqstan – Shanhaı yntymaqtastyq uıymynyń belsendi múshesi. SHYU-nyń Bishkekte ótken samıtinde sóılegen sózimde onyń halyqaralyq arenadaǵy uıymdardyń ishindegi eń tabystysy ekenin atap óttim», – dedi Qazaqstan Prezıdenti.
Sonymen qatar Memleket basshysy SHYU-nyń keń aýqymdy problemalardy qamtıtyn kún tártibiniń biregeıligine basa mán berdi.
«SHYU, shyn máninde, qaıshylyq týǵyzatyn uıym emes. Onyń qyzmeti konstrýktıvtilikke, múshe memleketter arasyndaǵy yntymaqtastyqty damytýǵa baǵyttalǵan. Sonymen qatar bul Uıym halyqaralyq jaǵdaıdy jaqsartýǵa zor úles qosýdy kózdeıdi. Sondyqtan Qazaqstan SHYU-nyń jumysyna belsendi qatysa beredi jáne onyń áleýetin nyǵaıtýǵa óziniń eleýli úlesin qosady», – dedi Qazaqstan kóshbasshysy.
Memleket basshysy elimizdegi aldaǵy jalpyulttyq referendýmǵa baıqaýshylar mısıasyn uıymdastyrǵany úshin SHYU-nyń Bas hatshysyna rızashylyǵyn bildirdi.
Óz kezeginde Chjan Mın SHYU-ǵa múshe basqa da memleketterdiń kóshbasshylarymen birge ózin Uıymnyń Bas hatshysy laýazymyna taǵaıyndaý týraly sheshim qabyldaý kezinde senim bildirip, qoldaý kórsetkeni úshin Qasym-Jomart Toqaevqa alǵys aıtty. Ol Prezıdentke Uıymnyń áleýetin jáne múshe memlekettermen aradaǵy yntymaqtastyqty odan ári nyǵaıtý úshin bar kúshin salatynyn jetkizdi.
Dıplomat Qazaqstannyń áleýmettik-ekonomıkalyq damý jolyndaǵy jetistikterin, Prezıdenttiń basshylyǵymen iske asyrylyp jatqan aýqymdy reformalardy joǵary baǵalady. Chjan Mın Uıymnyń áleýetin arttyrýǵa elimizdiń qosqan eleýli úlesin jáne ony damytýǵa belsendi atsalysatynyn aıtty.
Áńgimelesý barysynda Uıymnyń Bas hatshysy Prezıdentke qyrkúıek aıynda Samarqandta ótetin Shanhaı yntymaqtastyq uıymyna múshe memleketter basshylary keńesiniń kezekti otyrysyna daıyndyq barysy týraly málimet berdi.
Sonymen qatar Qasym-Jomart Toqaev pen Chjan Mın halyqaralyq kún tártibindegi ózekti máseleler jóninde pikir almasty.