Memleket basshysy "Nura" aýdanyndaǵy Greenline býlvaryn aralap kórdi, - dep habarlaıdy Aqshamnews.kz.
Aýmaǵy 3,8 gektar bolatyn nysandaǵy jumystyń birinshi kezeńi aıaqtalǵan. Munda jaıaý júrginshilerge jáne velosıpedshilerge arnalǵan joldar, sáýlettik qalyptar jáne jasandy toǵandar bar.
Memleket basshysyna Astana qalasyndaǵy abattandyrý jumystary jaıynda málimet berildi.
Jeńis Qasymbek elordada qazir 170 qoǵamdyq keńistik pen aýlany abattandyrý boıynsha keshendi baǵdarlama iske asyrylyp jatqanyn aıtty.
Bul jumystar Botanıkalyq baqta, Trıatlon parkinde, Atatúrik, Beıbitshilik jáne kelisim, Prezıdent saıabaqtary men qalanyń negizgi kóshelerinde júrgizilip jatyr.
Sonymen qatar, "Myńjyldyq" aleıasyn abattandyrýdyń tujyrymdamasy jasaldy. Esil ózeniniń jaǵalaýyn rekonstrýksıalaý sharalary aıaqtalýǵa jaqyn.
Memleket basshysy qala ınfraqurylymyn jetildirý, turǵyndarǵa zamanaýı ári qolaıly, ekologıalyq turǵydan taza orta qalyptastyrý baǵytyndaǵy jumystardy jalǵastyrý jóninde tapsyrma berdi.