Prezıdent JD com elektrondy komersıa alańynda Qazaqstannyń ulttyq pavılonyn ashty, dep habarlaıdy Almaty-akshamy.kz. Aqordanyń resmı saıtyna silteme jasap.
Memleket basshysy Qasym-Jomart Toqaev bıznesti onlaın-keńistik arqyly júrgizý álem ekonomıkasynyń mańyzdy baǵytyna aınalǵanyn aıtty.
«Qazir elektrondy saýda naryǵynyń kólemi 3,5 trıllıon dollarǵa jetti. Bul úderis jyl saıyn artyp keledi. Halyqaralyq onlaın saýda-sattyqty damytý isinde Qytaı óte mańyzdy ról atqarady. Búgin álemdegi asa iri elektrondy saýda alańynda Qazaqstannyń ulttyq pavılony ashylady. Bul qadam eki eldiń alys-berisin jandandyrmaq. Byltyr Qazaqstan men Qytaı arasyndaǵy taýar aınalymy 31 mıllıard dollarǵa jetti. Biz munymen shektelip qalmaımyz. Elektrondy komersıa salasyndaǵy áriptestikti odan ári damytamyz. Sonda ekijaqty saýda aınalymyn jaqyn arada 40 mıllıard dollarǵa jetkizýge múmkindik týady. «Sıfrly Jibek joly» bastamasy osy mindetti oryndaýǵa jol ashady», – dedi Memleket basshysy.
Aıfta keteıik, JD com (Jingdong Mall) – Qytaıdaǵy taýarlar men qyzmetter satýǵa arnalǵan eń iri onlaın platforma. 1998 jyly negizi qalanǵan onlaın rıteıl alańynyń 400 mıllıonnan astam paıdalanýshysy bar. 2022 jyly JD com 1 trıllıon ıýán taza paıda taýyp, Qytaıdaǵy elektrondy saýda alańdarynyń arasynda birinshi orynǵa shyqqan. Qazirgi kezde platformada 40-tan asa eldiń ulttyq pavılondary jumys isteıdi. Qazaqstannyń ulttyq pavılonyn ashý jóninde kelisimge bıyl naýryz aıynda qol qoıyldy. Búginde ulttyq pavılonymyzda elimizdiń birneshe ónim túri satylymǵa qoıylǵan. Buǵan qosa aldaǵy ýaqytta eksporttyq áleýeti joǵary 15 otandyq azyq-túlik óndirýshisiniń ónimderin (kúnbaǵys maıy, kondıter ónimderi, sýsyndar) Qytaı naryǵyna shyǵarý josparlanyp otyr.
