Qasym-Jomart Toqaev HIV KazEnergy Eýrazıalyq forýmyna qatysýshylarǵa beıneúndeý jasady
Memleket basshysy Dúnıejúzilik energetıka aptalyǵy men HIV KazEnergy Eýrazıalyq forýmy aıasynda ótken «Álemdik energetıkalyq trılemma 2021 – komponentter teńgerimi: energetıkalyq aımaqtar boıynsha ózgerister navıgasıasy» atty jahandyq plenarlyq májiliste beıneúndeý jasady, dep habarlaıdy Almaty-akshamy.kz. Akorda.kz-ke silteme jasap.
Prezıdent Ortalyq Azıa aımaǵynda alǵash ret ótkizilip otyrǵan Dúnıejúzilik energetıka aptalyǵynyń uıymdastyrylýyn qoldady.
«Osy aptada 90 eldiń basshylary men bedeldi tulǵalary Qazaqstanda bas qosty. Glazgoda ótetin Klımattyń ózgerýi jónindegi SOR26 konferensıasynyń qarsańynda qol jetkizilgen nátıjeler men ortaq bolashaqqa qatysty kózqarastarymyzdy talqylaý úshin jınaldyq», – dedi Qasym-Jomart Toqaev.
Memleket basshysy osy baǵyttaǵy ulttyq basymdyqtar men mindettemeler týraly aıta kelip, Qazaqstan klımattyń ózgerýine qarsy kúres pen Parıj kelisiminiń maqsattary jolyndaǵy jahandyq kúsh-jigerdi tolyq qoldaıtynyn atap ótti.
Sonymen qatar Prezıdent álemniń jańa damý kezeńine qadam basqany týraly pikirin ortaǵa saldy. Onyń aıtýynsha, jańa tehnologıalar qazba otyn túrlerinen jańartylatyn qýat kózderine, sýtegi men ıadrolyq energıaǵa kóshýdi talap etedi.
«Men Úkimetke 2030 jylǵa qaraı elektr energıasyn óndirýde jańartylatyn jáne balamaly energıa kózderiniń úlesin 15 paıyzǵa jetkizýdi tapsyrdym. Qazirgi tańda 2000 MVt-qa jýyq jańartylatyn qýat kózderi paıdalanýǵa berildi. Qazaqstannyń kózdegen maqsatqa jetý jolyndaǵy baǵyty durys. Alaıda, kómirtegi beıtaraptyǵyna qol jetkizý úshin tek jańartylatyn energıaǵa ıek artý jetkiliksiz», – dedi Memleket basshysy.
Qasym-Jomart Toqaev óziniń ustanǵan saıasatyna sáıkes, Úkimettiń energıa óndirý, energıany únemdi paıdalaný, sıfrlandyrý jáne turaqty ekonomıkalyq ósim sıaqty negizgi baǵyttardy ilgeriletýge yqpal etetin birqatar ulttyq jobalardy ázirlep jatqanyn atap ótti.
«Bul jobalar asa mańyzdy, óıtkeni olar mıllıardtaǵan adamnyń bıznes júrgizýiniń jáne kúndelikti ómiriniń «jańa normasyna» aınalady», – dedi Prezıdent.
Memleket basshysy sóziniń sońynda forýmnyń pikirtalas platformasynyń biregeıligine toqtaldy. Osy rette atalǵan jıyn álemniń jahandyq maqsatqa – klımattyń ózgerýine tosqaýyl qoıýǵa qol jetkizýine septigin tıgizetin qazirgi úrdisterdi, boljamdar men josparlardy qarastyrý úshin jetekshi sarapshylarǵa jaqsy múmkindik beretinin jetkizdi.