Memleket basshysy Olaf Sholsti saılanýymen quttyqtady
Qazaqstan Prezıdenti Qasym-Jomart Toqaev barsha qazaqstandyqtyń jáne jeke óziniń atynan Olaf Sholsti Germanıa Federatıvtik Respýblıkasynyń Federaldyq Kansleri qyzmetine kirisýimen shyn júrekten quttyqtady, dep habarlaıdy Almaty-akshamy.kz Akorda.kz-ke silteme jasap
«Bul tarıhı oqıǵa – halqyńyzdyń Sizge jáne Ózińiz basqaryp otyrǵan koalısıaǵa elińizdiń saıası-ekonomıkalyq órkendeýin jalǵastyrýǵa, sondaı-aq onyń halyqaralyq deńgeıdegi ulttyq múddelerin ilgeriletýge baǵyttalǵan mańyzdy josparlaryńyzǵa artqan seniminiń aıqyn dáleli. Osy tusta Sizdiń qajyrly eńbegińiz Otanyńyzdy búgingiden de bıik belester men jańa tabystarǵa jeteleı berýine tilektestigimdi bildiremin», – delingen quttyqtaý hatta.
Memleket basshysy Germanıany Qazaqstannyń Eýropalyq Odaqtaǵy basty seriktesi dep sanaıtynyn jáne eki el arasyndaǵy qarqyndy damyp kele jatqan strategıalyq yntymaqtastyqty nyǵaıtýǵa erekshe mán beretinin atap ótken.
«Qazaq-german jáne Ortalyq Azıa – Eýropalyq Odaq formattaryndaǵy san qyrly yqpaldastyǵymyzdyń mazmunyn odan ári baıytý maqsatynda Sizben qoıan-qoltyq jumys isteýge daıyn ekenimdi rastaımyn. Oraıly múmkindikti paıdalanyp, ózara yńǵaıly ýaqytta Sizdi Qazaqstanǵa resmı saparmen kelýge shaqyramyn», – dep jazylǵan Prezıdenttiń jedelhatynda.
Qasym-Jomart Toqaev Olaf Sholstiń ıgi bastamalaryna sáttilik, otbasyna baıandy baqyt, al dostas german halqyna mol yrys pen qut-bereke tilegen.