Memleket basshysy jasandy ıntellekt pen IT salasyndaǵy adamı kapıtaldy damytý elimiz úshin strategıalyq mańyzy bar másele ekenin atap ótti.
Memleket basshysy Qasym-Jomart Toqaev «Digital Bridge» halyqaralyq tehnologıalyq forýmy aıasynda halyqaralyq IT kompanıalardyń basshylarymen birqatar kezdesý ótkizdi,dep habarlaıdy Almaty-akshamy.kz Aqordanyń baspasóz qyzmetine silteme jasap.
Qasym-Jomart Toqaev pen Samsung Electronics kompanıasynyń korporatıvti prezıdenti In Iong Rı IT mamandardy daıarlaý, birlesken ǵylymı-zertteý jumystaryn júrgizý jáne ǵylym salasynda yntymaqtastyq ornatý múmkindikterin qarastyrdy.
Arsen Tomskıı Memleket basshysyna Qazaqstandaǵy kólik qyzmeti salasyndaǵy eń tanymal mobıldi qosymshalardyń biri inDriver-diń qyzmetin damytýdyń perspektıvalary týraly aıtty. Kompanıa basshysynyń aıtýynsha, Astana men Almatyda eki keńse ashylǵan. Sonymen qatar inDriver Astana Hub rezıdenti atandy. Arsen Tomskıı Spark sıfrlyq ýnıversıtetin qurý jáne jastardy qoldaýǵa baǵyttalǵan birqatar komersıalyq emes jobany júzege asyrý josparlaryn jetkizdi.
G42 kompanıasynyń dırektory Mansýr Ibragım ál-Mansýrımen kezdesýde aqparattyq tehnologıalar men sıfrlyq qaýipsizdik salasyndaǵy yntymaqtastyqty keńeıtýge basa nazar aýdaryldy. Qasym-Jomart Toqaev G42 jasandy ıntellekt, cloud ınfraqurylymy jáne Big Data salalarynda birlesken jobalardy júzege asyrý josparlary týraly málimetter aldy. Memleket basshysy jasandy ıntellekt pen IT salasyndaǵy adamı kapıtaldy damytý elimiz úshin strategıalyq mańyzy bar másele ekenin atap ótti.
Bharti Enterprises jáne OneWeb quryltaıshysy ári tóraǵasy Sýnıl Bartı Mıttalmen kezdesýde shalǵaı eldi mekenderdi ınternetpen qamtý úshin tómen orbıtaly spýtnıkterdi jáne jerústi stansıalar jelisin paıdalaný máseleleri talqylandy.