Toqaev azamattardyń quqyqtaryn tıimdi qorǵaýdy qamtamasyz etýge baǵyttalǵan birqatar tapsyrma berdi.
Prezıdent Adam quqyqtary jónindegi ýákil Elvıra Ázimovany qabyldady, dep habarlaıdy Almaty-akshamy.kz Aqorda saıtyna silteme jasap.
Qasym-Jomart Toqaevqa Adam quqyqtary jónindegi ýákildiń 2021 jyly atqarǵan jumysynyń qorytyndylary, sonyń ishinde azamattardyń quqyqtaryn qaıta qalpyna keltirýge kómektesý úshin qabyldanyp jatqan sharalar týraly málimet berildi.
Elvıra Ázimova Memleket basshysyna sotqa deıingi tergeý satysynda onyń ishinde qańtar oqıǵasy aıasynda adam quqyqtaryn qorǵaý máseleleri jóninde baıandady. Sonymen qatar Prezıdentke quqyq qorǵaý organdarynyń qyzmeti týraly zańnamany jetildirý, tótenshe jaǵdaı rejımi kezinde adam quqyqtaryn qorǵaý jáne alqabıler sotynyń mandatyn keńeıtý jóninde usynys berildi.
Adam quqyqtary jónindegi ýákilge Konstıtýsıalyq sotqa júginý quqyǵyn berý týraly Prezıdent bastamasy aıasynda ombýdsmen Memleket basshysyna Eýropa Keńesi Venesıa komısıasynyń usynystary jóninde jetkizdi. Atalǵan bastama Qasym-Jomart Toqaevtyń jýyrdaǵy Joldaýynda aıtyldy.
Elvıra Ázimova Prezıdentke adam quqyqtary salasyndaǵy ekinshi sharalar toptamasy boıynsha ázirlenip jatqan usynystardy tanystyrdy.
Kezdesý qorytyndysy boıynsha Qasym-Jomart Toqaev azamattardyń quqyqtaryn tıimdi qorǵaýdy qamtamasyz etýge baǵyttalǵan birqatar tapsyrma berdi. Memleket basshysy ýákildiń Bas prokýratýramen tyǵyz baılanysta bolyp, halyqqa tergeý nátıjeleri týraly keńinen aqparat berý qajet ekenin atap ótti.