QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda ınflásıanyń ósýine, azyq-túlik pen munaı ónimderi baǵasynyń kóterilýine jol bermeý sharalary qaraldy.
Premer-Mınıstr Memleket basshysy Qasym-Jomart Kemeluly Toqaev Parlament Májilisinde sóılegen sózinde ınflásıa máselelerine erekshe kóńil bólip, baǵalardy turaqtandyrý mindetin qoıǵanyn atap ótti, dep habarlaıdy Almaty-akshamy.kz
«Inflásıa deńgeıi ótken jyly qyrkúıektegi 8,9%-dan jeltoqsanda 8,4%-ǵa deıin tómendedi. Biraq bul da – joǵary kórsetkish. Bul adamdardyń satyp alý qabiletin tómendetip, jalaqylarynyń qunsyzdanýyna áser etedi. Tutastaı alǵanda, memlekettiń ekonomıkalyq jáne áleýmettik saıasatynyń tıimdiligin tómendetedi. Sondyqtan ınflásıa men baǵa turaqtylyǵyna erekshe mańyz berilip otyr», - dedi Á. Smaıylov.
Úkimet basshysy azyq-túlik taýarlaryn óndirý kólemin arttyrýǵa, ishki naryqta taýarlardyń jetkilikti bolýyna, energıa kózderine baǵa belgileý tetigi men aqyly qyzmetterdiń tarıfterin qaıta qaraýǵa múmkindik beretin júıeli sharalar qabyldaý qajettigin atap ótti. Básekelestikti qorǵaý jáne damytý agenttigine monopolıaǵa qarsy shara qoldaný jáne deldaldyq sqemalardy tekserý boıynsha jumysty kúsheıtý tapsyryldy.
«Biz jaýapsyz satýshylar men alyp-satarlarǵa baǵany negizsiz ósirý esebinen paıda tabýǵa jol bermeýimiz qajet», - dedi Á. Smaıylov.
Óńirlerdiń ákimdikterine ústeme baǵa men shekti baǵany baqylaý jumysyn kúsheıtý, Qarjy mınıstrligine Saýda jáne ıntegrasıa mınıstrligimen birlesip, naqty taýarlardy ımporttaý nemese óndirý kezinen bastap olardy satýǵa deıin mindetti túrde elektrondyq shot-faktýralardy jazyp berý boıynsha pılottyq jobany júrgizý máselesin pysyqtaý tapsyryldy, bul alyp-satýdyń árbir deńgeıinde ústeme baǵaǵa monıtorıń júrgizýge múmkindik beredi. İshki naryqty qamtamasyz etý úshin Aýyl sharýashylyǵy mınıstrligine aýyl sharýashylyǵy ónimderin óndirý men tutyný kólemin eseptep, qajet bolǵan jaǵdaıda syrtqa satý boıynsha shekteýler qoıý tapsyryldy. Energetıka mınıstrligine bir aı ishinde munaı ónimderin óndirý jáne satý qurylymyn reformalaý boıynsha zańnamalyq túzetýlerdi daıyndaý tapsyryldy.
«Munaı ónimderin jetkizý tizbegin qysqartyp, baǵa belgileý praktıkasyn taldaý qajet», - dedi Á. Smaıylov.
Úkimet basshysy Básekelestikti qorǵaý jáne damytý agenttigine Indýstrıa jáne ınfraqurylymdyq damý mınıstrligimen birlesip, kómir baǵasyn ótken jylǵy deńgeıde saqtap qalý úshin zańǵa sáıkes sharalar qabyldaýdy tapsyrdy.
Indýstrıa jáne ınfraqurylymdyq damý mınıstrligine tolyq jumys istemeı turǵan nemese toqtap turǵan tamaq ónerkásibi kásiporyndaryna monıtorıń pen taldaý júrgizip, olardyń tolyqtaı jumys isteýi úshin sharalardy iske asyrý tapsyryldy.
Ulttyq ekonomıka mınıstrligine memlekettik organdarmen birlesip, osy jylǵy 1 aqpanǵa deıin Úkimetke Inflásıany baqylaý jáne tómendetý jónindegi sharalar keshenin engizý tapsyryldy.