Polıseı formasyn ǵana kıetin saqshylar búgin barlyǵy ulttyq kıimmen keldi
QR İİM Kóliktegi polısıa departamentiniń qyzmetkerleri yrys pen yntymaqtyń basy bolǵan Naýryz merekesin sán-saltanatpen qarsy aldy. Merekelik is-shara «Qosh keldiń, Áz Naýryz» atty teatrlandyrylǵan kórinispen ótti, dep habarlaıdy Almaty-akshamy.kz.
Ulttyq naqyshta tamasha bezendirilgen kıiz úı maketteri men onda koıylǵan halqymyzdyń turmysta qoldanatyn zattary sharanyń shyraıyn kirgizdi. Túrli dámge toly dastarhan, naýryz-kóje, et pen qymyz, qurt pen irimshik qazaqtyń qonaqjaılyǵyn dáriptedi.
Departamenttiń málimetinshe, kúndelikti qyzmette polıseı formasyn ǵana kıetin saqshylar búgin barlyǵy ulttyq kıimmen kelgen.
«Ulystyń uly kúninde sizderge zor densaýlyq, otbastaryńyzǵa baqyt tileımin. Sondaı-aq ol jańarý men jańǵyrý jolyn tańdaǵan elimizdiń irgesi bútin, eńsesi bıik, birligi bekem bolsyn!»,-dedi Kóliktegi PD-niń bastyǵy Ońal Bekeev.
Kóliktegi polısıa departamentiniń baspasóz qyzmetiniń málimdegendeı, mereke barysynda departamenttiń apparat qyzmetteri ultymyzdyń salt-dástúrlerinen kórinis kórsetý boıynsha «Yntymaq» «Dostyq» jáne «Bereke» aýyldary bolyp úsh topqa bólinip, ózara saıysqa tústi.
Ádilqazylar alqasynyń sheshimimen «Besikke salý», «Tusaý kesý», «Betashar», «Bata berý» syndy halqymyzdyń tamasha joralǵylaryn naqyshyna keltire nasıhattaı bilgen qyzmetkerler jeńimpaz atandy.
Buǵan qosa, «Eń úzdik qazaq úı», «Eń úzdik ulttyq kıim», «Eń úzdik kórsetilim» jáne «Eń úzdik dastarhan» nomınasıalary boıynsha da saıys tartysty ótip, úzdikter anyqtaldy.
Tusaý kesý rásimi departament bastyǵy Ońal Bekeevke usynyldy. Polısıa general-maıory Birhanym esimdi sábıdiń tusaýyn kesip, oǵan «ómiri shýaqty bolsyn, taǵdyr jolynda súrinbeı alǵa umtylsyn», – dep aq batasyn berdi.
Merekelik shara sheńberinde án aıtylyp, kúıden shashý shashyldy. Toıdyń sánin ulttyq oıyndar asha tústi. Sonyń ishinde «qol kúresi», «arqan tartý», «kir kóterý»» saıystary bastalǵanda saqshylardyń delebesi qozyp, merekeniń kórkin qyzdyrdy. Barlyq basqarma qyzmetkerleri top-topqa bólinip arqan tartysyp, balasha asyq oınap máz-meıram bolysty. Uttyq taǵamdarǵa toly qazaqy dastarhannan kelgen qonaqtar dám tatyp, naýryz kóje ishti.
«Berekeli de merekeli osynaý sharanyń eń basty qonaqtary kóliktegi ishki ister organdarynyń ardagerler boldy. Olar da bir-birimen áńgimelesip, ózderinen keıingi býynǵa aq tilekterin jetkizdi. Eldik pen jasampazdyqtyń belgisindeı bolǵan bul kúndi tártip saqshylary berekeniń bastaýy dep, erekshe ulyqtap jatty»,-delingen habarlamada.