Qaraǵandy oblysynyń polıseıleri 130 balanyń ómirin saqtaý jolynda erlikpen qaza tapqan áriptesterin eske aldy
Qaraǵandy oblysy Buqar-Jyraý aýdanyna qarasty Zarechnyı aýylynda osydan 15 jyl buryn qyzmet babynda qaza bolǵan jol polısıasynyń ınspektory Qaırat Jumabekovti eske alýǵa arnalǵan is-shara ótti, – dep habarlaıdy Almaty-akshamy.kz Polisia.kz-ke silteme jasap.
Sharaǵa aýdannyń bılik ókilderi, Qaırat Jumabekovtiń týǵan-týystary men áriptesteri jáne mektep oqýshylary qatysty. Aldymen jınalǵandar aýyldyń kire berisinde batyrdyń qurmetine ornatylǵan memorıaldyq taqta tasyna gúl shoqtaryn qoıyp, bir mınýttyq únsizdikpen eske aldy.
“Óli razy bolmaı, tiri baıymaıdy” degendeı, qatardan erte ketken tártip saqshylary eshqashan áriptesteriniń esinen ketken emes. Sondyqtanda batyrlyq tanytyp, antyna adal bolǵan Qaırat Jumabekovti eske alý is-sharasyna departament bastyǵy Sanjar Ádilov arnaıy qatysty.
- Qabyrǵamyzdy qaıystyrǵan qaıǵyly oqıǵanyń bolǵanyna bıyl 15 jyl boldy. Osynshama ýaqyt ótse de, áriptesimizdiń esimi máńgi esimizde. Al jasaǵan erligi keleshek urpaqqa úlgi bolary sózsiz, – dedi oblystyń bas polıseıi.
30 jasynda qyrshyn ketken Qaırat Jumabekovtiń erligi áli kúnge deıin el esinde. 2008 jyldyń mamyrynda Qaraǵandydan Astanaǵa saıahatqa barǵan 130 balanyń joldaǵy qaýipsizdigi sol kezdegi jol polısıasynyń ınspektorlary aǵa serjant Qaırat Jumabekov pen Dmıtrıı Pýgachqa tapsyrylǵan. Elordany emin-erkin aralap, kózderi bal-bul janǵan balalar Astanadan Qaraǵandyǵa qaıtyp kele jatqanda Arshaly kentiniń tusynda avtobýsqa qarsy júk kóligi shyqqan. Mine osy sátte ózine júktelgen mindetti abyroıly atqarǵan Qaırat Jumabekov artyndaǵy balalardy aman alyp qalý úshin óziniń ómirin qaterge tigip, erlikpen qaza tapqan edi.
– Ol kezde bizde jol-kólik oqıǵasynan qashýymyzǵa múmkindik boldy. Alaıda Qaırat artyndaǵy balalardyń qaýipsizdigin oılap, qarsy kelgen kesapatqa ózin tosty. Bul degenimiz onyń antyna adaldyǵynyń belgisi. Ol óte aqkóńil jigit etedi. Ómirden erte ketkeni ókinishti, – dedi sol kezdegi Qaırat Jumabekovtiń serigi bolǵan Dmıtrıı Pýgach.
Búginde Qaırat jasaǵan erlik esh umytylǵan emes. Kerisinshe antyna adal bolǵan asyl azamattyń batyrlyǵy urpaqtan-urpaqqa úlgi bolady.