Baıqaý barysynda qatysýshylar ónerin ortaǵa salyp, ulttyq kıimdermen sán sherýinen ótip, «Aqyl men parasat» bóliminde synǵa tústi.
Pavlodarda alǵash ret ulttyq dástúrge saı «ERTIS ARUY» atty sulýlyq baıqaýy ótti, dep habarlaıdy Almaty-akshamy.kz.
Ulystyń uly kúnine oraı oblystyq «Shańyraq» halyq shyǵarmashylyǵy ortalyǵymen qolǵa alynǵan joba aımaqtyń ár óńirinen aqyly men kórki saı boıjetken qyzdardyń basyn qosty. Jeńimpazdar men júldegerler oblys namysyn respýblıkalyq «Qazaq arýy» sulýlyq saıysynda qorǵaý múmkindigine ıe boldy.
Osydan týra bir aı buryn oblystaǵy «ERTIS ARUY» baıqaýynyń irikteý kezeńi ótken bolatyn. Ár qala, aýdannan júzdegen qyzdyń arasynan aqtyq synǵa qatysýǵa laıyqty 16 úmitker tańdalyp alyndy.
«ERTIS ARUY» baıqaýynyń basty maqsaty qazaq qyzyna tán kórkem minez, sulýlyq pen ınabattylyqty, aqyl men ádeptilikti boıyna sińirgen boıjetkendi anyqtaý bolatyn. Kastıng barysynda da osyǵan erekshe mán berdik. Taǵy bir basty talap - ár qatysýshynyń qazaq tilin jetik bilýi. Árıne, sulýlyq baıqaýy bolǵan soń qyzdardyń boıyn, syrtqy kelbetin, dene bitimin de eskerdik», - deıdi joba uıymdastyrýshysy, oblystyq «Shańyraq» halyq shyǵarmashylyǵy ortalyǵy basshysynyń orynbasary Zamıra Amangeldiqyzy.
Osylaısha, aldyn ala irikteýden ótken 16 úmitker bir aı boıy kásibı horeograf, sán salasynyń maıtalman mamandarynyń kómegimen daıyndyq júrgizdi. Sol eńbekteriniń nátıjesin «Ertis arýy» baıqaýynyń aqtyq synynda kórsete bildi.
Boıjetkenderdiń babyn synap, baǵyna jol ashý jaýapkershiligi quramynda oblystyq «Nur Ana álemi» qoǵamdyq uıymynyń jetekshisi Baqytjamal Maksılova, oblystyq «Halyq radıosynyń» bas redaktory Raýshan Sybanjanova, qazaq estradasynyń juldyzy, ánshi Rınat Malsagov, jekpe-jek ulttyq sport túrinen oblystyq bas bapker, halyqaralyq dárejedegi sport sheberi Altynbek Rshanov jáne «Mıss Pavlodar-2016», «Mıss Qazaqstan-2016» baıqaýynyń fınalısi Aızat Baıtenova bar qazylar alqasyna júkteldi.
Baıqaý barysynda qatysýshylar ónerin ortaǵa salyp, ulttyq kıimdermen sán sherýinen ótip, «Aqyl men parasat» bóliminde synǵa tústi.
«Bul - ulttyq dástúrge saı ótken sulýlyq baıqaýy. Munda ashyq nemese qysqa kıim kıýge jol berilgen joq. Qazaqtyń ulttyq kıimderin dáriptep, nasıhattaýǵa tyrystyq. Suraq-jaýap bóliminde de qatysýshylarǵa qazaqtyń salt-dástúrine qatysty saýaldar qoıylǵanyn kórdińizder. Sondaı-aq, el tarıhynda aty qalǵan batyr, dana analarymyzǵa qatysty suraqtar ázirlendi. Bul - jaı baıqaý emes, tárbıe quraly dese de bolady. Deıturǵanmen sulýlyq baıqaýy bolǵan soń, álemdik standarttarǵa saı qyzdardyń bet-pishimine, symbatyna, boıyna nazar aýdardyq», - deıdi qazylar alqasynyń tóraıymy Aızat Baıtenova.
Baıqaý qorytyndysy boıynsha, bas júlde, ıaǵnı «ERTIS ARUY» ataǵyn Maı aýdanynyń úkilegen úmiti Dana Taıtýlenova jeńip aldy. Oǵan belgili sáýletshilerdiń jobaǵa arnap ázirlegen, baǵaly tastarmen kómkerilgen «ERTIS ARUY» táji tabys etildi.
Birinshi oryn Ekibastuz qalasynyń atynan qatysqan Aısana Haırýlaevaǵa, ekinshi oryn Aqqýly aýdanynan Gúlnur Kerimqulǵa, úshinshi oryn aqtoǵaılyq Anel Nurdáýletovaǵa buıyrdy. Baıanaýyldyq Maýkenova Janerke «Ónerli arý», al Maı aýdanynyń atynan qatysqan Nazerke Qaıyrgeldınova «Kórermen kózaıymy» atalymyna ıe boldy.
Atap óterligi, jeńimpaz jáne júldeger atanǵan tórt boıjetken kelesi jyly ótetin «Qazaqstan arýy» baıqaýyna joldama aldy. Oǵan deıin qyzdar jergilikti kásibı mamandardyń kómegimen daıyndyq júrgizbek.
