Kemelbek Oıshybaev: Pandemıa kóptegen ósek-aıańnyń týyndaýyna, feıkterdiń taralýyna túrtki boldy
Bul týraly «Astana Media Week – 2021» medıa aptalyǵy aıasyndaǵy «Medıany damytý strategıasy» atty dóńgelek ústel barysynda QR Aqparat jáne qoǵamdyq damý vıse-mınıstri Kemelbek Oıshybaev aıtty, dep habarlaıdy Almaty-akshamy.kz QazAqparat saıtyna silteme jasap.
Pandemıa bastalǵannan beri 1 800-den astam feık aqparat áshkerelendi.
«Eń aldymen aqparattyq tehnologıalardyń qarqyndy damýy tek qana aýdıtorıanyń qalaýyn ǵana emes, sonymen birge salanyń negizin de ózgertip jatqanyn kórip otyrmyz. Sıfrlyq tehnologıalar damyǵannan keıin aqparat BAQ-tyń monopolıasy bolýdan qaldy jáne aqparat birjaqty taratylmaıdy. Iaǵnı, ınternet pen áleýmettik jeliniń damýy sebepti BAQ-ta monopolıa joq. Endigi ýaqytta BAQ óziniń qyzmetin ózgertip, buqaralyq aqparat quralynan buqaralyq komýnıkasıa qyzmetine aınalyp barady. Qazirgi ýaqytta BAQ qyzmeti burynǵydaı eń aldymen aqparattandyrý emes. Qazirgi ýaqytta áleýmettik jeliniń kez kelgen qatysýshysy aqparat taratady», - dedi ol.
Onyń atap ótýinshe, qazirgi ýaqytta BAQ-tyń negizgi qyzmeti belgili bir aqparattyń mán-jaıyn naqtylaý, sarapshylardy tartý arqyly oryn alǵan jaıtty túsindirý jáne qajet bolǵan jaǵdaıda aqparatty teristeý bolyp otyr.
«Biz baıqap otyrǵan ekinshi ózgeris - pandemıa halyqpen ózara is-qımyldyń strategıasy men jańa ádisterin qaıta qaraý qajettigin jedeldetti», - dedi vıse-mınıstr.
Kemelbek Oıshybaev pandemıanyń kóptegen ósek-aıańnyń týyndaýyna, feıkterdiń taralýyna túrtki bolǵanyn jáne bul kóptegen elder úshin kúrdeli problemaǵa aınalǵanyn aıtty.
«Bizdiń mindetimiz qoǵam qorqynyshymen kúresý boldy. Ádisterdi ózgertýge de týra keldi. Burynyraq ta az bolmaǵan feıkter ótkir mańyzǵa ıe bolyp, olardyń taralýy arta tústi. Tipti Stopfake.kz arnaýly resýrsyn qurýymyzǵa da týra keldi. Joba «medıaǵa arnalǵan medıa» qaǵıdatymen jumys isteıdi. Kún saıyn saıt materıaldaryn iri basylymdar kóshirip basady. Pandemıa bastalǵannan beri koronavırýs, pandemıa, vaksınasıa jáne jalpy Qazaqstan týraly 1 800-den astam feık áshkerelendi», - dedi ol.