Saılaýǵa bes úmitker qatysyp jatyr
24 qazanda tańerteń Ózbekstanda prezıdent saılaýy bastaldy, dep habarlaıdy Almaty-akshamy.kz.
Saılaý ýchaskeleri jergilikti ýaqyt boıynsha tańǵy saǵat 08:00-de ashyldy (Nur-Sultan boıynsha 09:00).
Elde resmı túrde jumys istep jatqan bes saıası partıa óz úmitkerlerin tirkedi. Sarapshylardyń paıymdaýynsha, jeńiske jetetin basty úmitker eldiń qazirgi prezıdenti - 64 jastaǵy Shavkat Mırzıóev. Ol Ózbekstannyń Lıberal-demokratıalyq partıasy atynan túsip jatyr.
Onymen saılaýǵa túsip jatqandar «Ulttyq jańǵyrý» demokratıalyq partıasynyń ókili Álisher Qadyrov, Ekologıalyq partıanyń ókili Narzýlla Ablamýradov, «Ádildik» Sosıal-demokratıalyq partıasynyń ókili Bahram Abdýhalımov, sonymen qatar Halyq-demokratıalyq partıasynyń úmitkeri Maqsýda Varısova bar.
Daýys berý keshki saǵat 20:00-ge deıin jalǵasady (Nur-Sultan boıynsha 21:00). Respýblıkada barlyǵy 9925 daýys berý ýchaskesi jasaqtalǵan, sonymen qatar sheteldegi Ózbekstan ókildiginde júzge jýyq daýys berý orny ashylǵan. Ortalyq saılaý komısıasy saılaýshylardyń Biryńǵaı elektrondy tizimine 19,9 mln adamdy engizdi. Oǵan qosa 400 myńnan astam azamat ýaqytynan buryn daýys berýge qatysqan, ol qazannyń 14 men 20 aralyǵynda ótken.
Qaýipsizdikti qamtamasyz etý úshin Ózbekstan İİM-gi 53 myńnan astam qyzmetkeri men qoǵam ókilderin jumyldyrǵan. Saılaý ýchaskesine kelgen azamattardan karantın talaptary men qoǵamdyq qaýipsizdik erejelerin saqtaý usynylady. Pandemıa áli de jalǵasyp jatqandyqtan daýys berýshilerge birrettik maska, perchatka jáne qoldy dezınfeksıalaıtyn qural beriledi. Onyń ústine barlyq saılaý ýchaskelerinde medısınalyq pýnkt ashylaǵan, onda 21 myńnan astam medısına qyzmetkeri jumys istep jatyr.
Saılaý barysyn myńǵa jýyq halyqaralyq baıqaýshylar baqylaıdyr, onyń qatarynda TMD, TMD Parlament Assambleıasynyń, Shanhaı yntymaqtastyq uıymy, Islam yntymaqtastyq uıymdary, OBSE, IýNESKO jáne ózge uıym ókilderi bar. Sondaı-aq 41 eldiń 268 ókili de saılaý barysyn baqylaıdy. Saılaý jaıly aqparat taratý úshin 116 sheteldik jáne 1,5 myń jergilikti jýrnalıs akredıtasıadan ótken.