Odan bólek, Ózbekstan elshisi eki el aýmaǵynda birlesken farmasevtıka ónerkásibin ashý josparlanyp jatqanyn aıtty.
Ózbekstan Respýblıkasynyń Qazaqstandaǵy Tótenshe jáne Ókiletti elshisi Saıdıkram Nıazhodjaevtyń aıtýynsha, elde 400-deı mektep qazaq tilinde bilim berýde. Sonymen qatar, Ózbekstannyń 7 joǵary oqý ornynda gýmanıtarlyq jáne tehnıkalyq mamandyqtar qazaq tilinde úıretilip jatyr, dep habarlaıdy Almaty-akshamy.kz Qazaq radıosyna silteme jasap.
«2018 jyly Qazaqstanda Ózbekstan respýblıkasy jyly atalyp ótti. Aıtýly jyl aıasynda Qazaqstanda túrli baǵyttaǵy 90-nan astam is-shara uıymdastyryldy. Sáıkesinshe, 2019 jyly bizdiń elde Qazaqstan jyly atalyp ótildi jáne onyń aıasynda 80-nen astam is-shara ótti. Ekijaqty ótken is-sharalar saıası, aǵartý, mádenı jáne gýmanıtarlyq baǵytty meńzedi. Ókinishke qaraı, 2020 jyly pandemıaǵa baılanysty ekijaqty is-sharalardy toqtata turýǵa týra keldi. Degenmen eki el arasyndaǵy ózara baılanys toqtaǵan emes», - dedi Saıdıkram Nıazhodjaev elordadaǵy Ózbekstan elshiliginde ótken baspasóz máslıhatynda.
Odan bólek, elshi Ózbekstandaǵy qandastardyń taǵdyry týraly aıtty.
«Qazirgi tańda Ózbekstanda 822 myń qazaq ómir súrip jatyr. Olar Ózbekstan eliniń damýyna óz úlesin qosýda. Bizdiń elde 400-deı mektep qazaq tilinde bilim berip jatyr. Sonymen qatar, Ózbekstannyń 7 joǵary oqý ornynda gýmanıtarlyq jáne tehnıkalyq mamandyqtar qazaq tilinde úıretilip jatyr. 1992 jyldan beri Ózbekstannyń 30 oblys ortalyǵynda qazaq mádenı ortalyǵy jumys istep tur», - deıdi ol.
Buǵan deıin, Saıdıkram Nıazhodjaev bıylǵy 6 aı ishinde Qazaqstan men Ózbekstan eli arasyndaǵy taýar aınalymy 1,9 mlrd AQSH dollarǵa jetkenin málim etti. Odan bólek, Ózbekstan elshisi eki el aýmaǵynda birlesken farmasevtıka ónerkásibin ashý josparlanyp jatqanyn aıtty.