Respýblıka kúnine oraı Nurǵısa Tilendıev atyndaǵy memorıaldyq murajaıda «Óz elim» atty merekelik is shara ótkizildi. Konserttiń negizgi maqsaty - turǵyndar arasynda patrıottyq sezimdi arttyrý. Shara barysynda ónerpazdar kompozıtor, halyq qaharmany N.Tilendıevtiń týyndylaryn oryndap, kórermenniń kóńilinen shyqty.
– Búgingi is sharanyń negizgi maqsaty - Respýblıka kúnin úlken deńgeıde atap ótý, N.Tilendıevtiń memorıaldyq mýzeıiniń bar ekenin kórsetý, kompozıtordyń shyǵarmalaryn tanytý. Búgingi konsertte Qurmanǵazy atyndaǵy konservotorıanyń stýdentteri óner kórsetti. Nurǵısa Tilendıevtiń «Qustar áni», «Týǵan el» t.b ánderi shyrqaldy. Bul memorıaldyq mýzeı 2014 jyly ashyldy. Kez kelgen adam kelip kóre alady. Oqýshylarǵa kirý tegin, – dedi N. Tilendıev atyndaǵy memorıaldyq mýzeıiniń ekskýrsovody Móldir Zikirbaı.
Áıgili kompozıtor Nurǵısa Tilendıevtiń týyndylaryn halyq súıip tyńdaıdy. Onyń shyǵarmashylyǵyn baǵalaıtyn jáne nasıhattaıtyn adam jeterlik. Solardyń biri Abaı atyndaǵy qazaq ulttyq opera jáne balet teatrynyń stajer solısi Shyńǵys Nurǵalıuly. Ol uly tulǵanyń ánderine degen mahabbaty bólek ekenin aıta ketti.
– Nurǵısa Tilendıev atamyz árbirimizdiń júregimizde dep oılaımyn. Osyndaı keremet merekede osy murajaıǵa kelip, ol kisiniń zattaryn kórip shabyttandym. Óte áserli sát deýge bolady. Bundaı uly tulǵalardyń esimi eshqashan óshpeıdi degen senimdemin. Árbir ániniń ózindik mán maǵynasy bar, – dedi ol.
Elge degen qurmet pen súıispenshilikti dáriptegen bul konsert kórermenderge rýhanı azyq syılap, óner men patrıotızmniń mańyzdylyǵyn umytpaýǵa shaqyrdy.