Bul - 2020 jylmen salystyrǵan kezdegi kórsetkish
Atalǵan qyzmetter (5,9 mln qyzmet) negizinen 17 jasqa deıingi balalarǵa kórsetilgen, dep habarlaıdy Almaty-akshamy.kz Elorda.info-ǵa silteme jasap.
Mindetti áleýmettik medısınalyq saqtandyrý júıesin iske qosý balalar men júkti áıelderge josparly stomatologıalyq kómekti tegin alýǵa múmkindik berdi. Al shuǵyl jaǵdaılarda zeınetkerler, kóp balaly analar, múgedekter, olarǵa kútim jasaıtyn jumyssyzdar, AÁK alýshylar, sondaı-aq belgili bir aýrýlarmen esepte turǵan pasıentter de tegin stomatologıalyq kómek ala alady.
«MÁMS júıesiniń iske qosylýynyń arqasynda 2020 jyldyń 1 qańtarynan bastap halyqtyń tıisti sanattary úshin belgili bir stomatologıalyq qyzmet qoljetimdi boldy. Júıe engizilgen alǵashqy jyly 6,8 mln qyzmet kórsetildi. Bir jyldan keıin MÁMS boıynsha stomatologıalyq kómekti tutyný bir jarym esege – 10 mln qyzmetke deıin óskeni baıqalady. Stomatologıalyq kómekti qarjylandyrýdy arttyrý oǵan muqtaj pasıentterdi kóp qamtýǵa múmkindik berdi. Bul rette taldaý kórsetkendeı, stomatologıalyq qyzmetter negizinen 17 jasqa deıingi balalarǵa kórsetilgen», - dep atap ótti qor sarapshylary.
Sońǵy eki jylda MÁMS esebinen qarjylandyrý aıasynda 37 mlrd teńgege 16,8 mln-nan astam stomatologıalyq kómek kórsetildi. 2022 jylǵa satyp alý josparynda 22,7 mlrd teńgege stomatologıalyq qyzmet kórsetý qarastyrylǵan.
Qor sarapshylarynyń túsindirýinshe, stomatologıalyq kómek pasıenttiń medısınalyq uıymdy erkin tańdaýy negizinde kórsetiledi, ıaǵnı ol úshin ýchaskelik dárigerdiń joldamasy talap etilmeıdi. Qyzmetterdi alý úshin qormen kelisimsharty bar jeke stomatologıalyq klınıkany tańdaýǵa nemese óz emhanańyzdyń stomatologıalyq kabınetine júginýge bolady.
Elimiz boıynsha 600-den astam medısınalyq uıym MÁMS boıynsha stomatologıalyq qyzmetter kórsetedi.
MÁMS paketi boıynsha josparly stomatologıalyq kómek myna pasıentter úshin qarastyrylǵan:
- balalar;
- júkti áıelder.
Shuǵyl stomatologıalyq kómekti azamattardyń myna sanattary ala alady:
- 18 jasqa deıingi balalar;
- júkti áıelder;
- UOS qatysýshylar jáne olarǵa teńestirilgen tulǵalar;
- I, II, III toptaǵy múgedekter;
- «Altyn alqa» jáne «Kúmis alqa» alqalarymen marapattalǵan kóp balaly analar;
- ataýly áleýmettik kómek alýshylar;
- jasy boıynsha zeınetkerler;
- juqpaly jáne áleýmettik mańyzy bar jáne aınalasyndaǵylarǵa qaýip tóndiretin aýrýlarmen aýyratyn naýqastar;
- erekshe qajettilikteri bar balaǵa nemese bala kezinen I toptaǵy múgedekke kútim jasaıtyn jumys istemeıtin qazaqstandyqtar.
Qandaı jaǵdaıdy tótenshe jaǵdaı dep sanaýǵa bolady?
- flegmonǵa teriniń, teri astyndaǵy tinderdiń jedel bakterıalyq ınfeksıasy, kóbinese streptokoktar nemese stafılokokktar sebep bolady;
- absess, fýrýnkýl, karbýnkýl sıaqty jaq-bet aımaǵynyń ótkir, birkelki emes qabyný aýrýlary;
- osteomıelıt;
- syrtqy qoljetimdilikti qajet etetin tis julý;
- tek stasıonar jaǵdaıynda ǵana kómek kórsetýge bolatyn basqa da jaǵdaılar.
Shuǵyl kómek pasıenttiń ómirine qaýip tóndiretin kenetten bolǵan mynadaı jiti jáne sozylmaly aýrýlar asqynǵan kezde kórsetiledi:
- pýlpıt (ótkir nemese sozylmaly);
- perıodontıt (ótkir jáne sozylmaly);
- jaq-bet jaraqaty (mysaly, tistiń taıýy nemese synýy);
- jaq-bet aımaǵynyń odontogendik jáne odontogendik emes qabyný aýrýlarynyń órshý belgileri;
- stomatıt;
- ótkir aýyrý jaǵdaılarynda;
- jedel aralasýdy qajet etetin emdeý ádisi.
Pasıentterdiń osy sanattary úshin MÁMS-te qandaı kómek tegin qarastyrylǵan?
- anestezıa;
- jaq nemese tistiń rentgenografıasy;
- tisti julý;
- daıyndaý jáne plomba salý;
- perıostotomıa;
- pýlpıt, perıodontıt, stomatıttiń jedel túrlerin, alveolıtti emdeý;
- absessti ashý.