Qalǵan 12 joba 2026 jyldan bastap kezeń-kezeńimen engiziletin bolady.
2025 jylǵa deıin 5 ýnıversıtettik jáne 3 kópbeıindi aýrýhana salynady. Bul týraly Úkimet otyrysynda QR Densaýlyq saqtaý mınıstri Ajar Ǵınıat aıtty, dep habarlaıdy Almaty-akshamy.kz QazAqparatqa silteme jasap.
Memleket basshysy Qasym-Jomart Toqaev bergen tapsyrmasynda densaýlyq saqtaý júıesiniń resýrstaryn, atap aıtqanda, 20 aýrýhananyń qunyn memlekettik-jekemenshik áriptestik tetikterin paıdalana otyryp, qaıta qaraý qajettigin erekshe atap ótti.
«Kópbeıindi aýrýhanalar salý boıynsha respýblıkalyq memlekettik-jekemenshik áriptestik jobalarynyń tizbesin ońtaılandyrý maqsatynda Densaýlyq saqtaý mınıstrligi qoldanystaǵy «Deni saý ult» ulttyq jobasyn iske asyrý aıasynda birinshi kezeńde 2025 jylǵa deıin 5 ýnıversıtettik aýrýhana jáne 3 kópbeıindi aýrýhana salýdy júzege asyrýdy josparlap otyr. Bul rette qalǵan 12 joba 2026 jyldan bastap kezeń-kezeńimen engiziletin bolady», - dedi Ajar Ǵınıat.
Onyń atap ótýinshe, búgingi tańda Indýstrıa jáne ınfraqurylymdyq damý, Ulttyq ekonomıka jáne Qarjy mınıstrlikterimen medısınalyq buıymdarsyz aýrýhana qurylysynyń 1 sharshy metriniń shekti qunyn jáne 1 tósek-orynǵa arnalǵan shekti alań normatıvin aıqyndaý jumysy júrgizilip jatyr. Sondaı-aq ońtaıly qarjy modelin pysyqtaý jáne joǵary atalǵan 8 joba boıynsha shyǵystardy ońtaılandyrýdy qolǵa aldy.
«Joǵaryda atalǵan tapsyrmalar aýrýhanalardy salý jónindegi baǵdarlamany iske asyrýdyń biryńǵaı tásili men ońtaıly nusqasy jóninde usynystar ázirleýge múmkindik beredi. Ýnıversıtettik aýrýhanalardy iske asyrýdyń basymdyǵy barlyq qalǵan jobalardy kadrlarmen qamtamasyz etý jáne bilim, ǵylym men praktıkanyń úshtuǵyrlyǵy qaǵıdatyn is júzinde qoldaný qajettiginen týyndaıdy», - dedi ol.