Ulttyq bank jeltoqsanda valútalyq ıntervensıalar júrgizgen joq.
Jeltoqsannyń qorytyndysy boıynsha, teńge 1 AQSH dollary úshin 462,66 teńgege deıin 1,3%-ǵa nyǵaıdy. Qazaqstan qor bırjasyndaǵy saýda-sattyqtyń ortasha kúndik kólemi bir aıda 132 mln-nan 141 mln AQSH dollaryna deıin ulǵaıdy, dep habarlaıdy Almaty-akshamy.kz.
QR Ulttyq banki baspasóz qyzmetiniń habarlaýynsha, saýda-sattyqtyń jalpy kólemi 2,95 mlrd AQSH dollaryn qurady. Bir aıda valúta naryǵy suranys pen usynys turǵysynan teńgerimdi boldy, aıyrbastaý baǵamy naryq talaptaryna saı qalyptasty.
Kvazımemlekettik sektor sýbektileriniń valútalyq túsimdi satýy ótken aıdyń ishinde shamamen 328,7 mln AQSH dollaryn qurady. Kvazımemlekettik sektor kompanıalary valúta naryǵynda satýdy ekinshi deńgeıli bankter arqyly óz betinshe júzege asyrady.
Jeltoqsanda Ulttyq qordan respýblıkalyq búdjetke transfertterdi qamtamasyz etý úshin 461 mln AQSH dollaryna valúta satyldy. Ulttyq qordan satý kólemi saýda-sattyqtyń jalpy kóleminen 16% boldy nemese bir kúnde 31 mln AQSH dollarynan aspady. Ulttyq qordyń qarajatymen operasıalar júrgizý kezinde Ulttyq bank naryqtyń beıtarap qaǵıdatyn saqtaıdy. Bul shetel valútasyn turaqty ári birkelki satý degendi bildiredi. Bul tájirıbe Ulttyq qor operasıalarynyń valúta naryǵyna áserin meıilinshe azaıtýǵa múmkindik beredi.
Zeınetaqy aktıvteriniń valútalyq úlesin qoldaý maqsatynda Ulttyq bank jeltoqsanda bırjalyq saýda-sattyqta shetel valútasyn satyp aldy, onyń jalpy somasy 43,2 mln AQSH dollaryn nemese naryqtyń jalpy kóleminen shamamen 1,5%-dy qurady.
Ulttyq bank jeltoqsanda valútalyq ıntervensıalar júrgizgen joq. Transparenttilik qaǵıdaty aıasynda Ulttyq bank valúta naryǵynda júrgiziletin barlyq operasıa týraly tolyq aqparatty úzdiksiz jarıalaıdy.
«Qysqa merzimdi perspektıvada teńge dınamıkasy geosaıası jaǵdaıdyń ózgerýine, ishki qatysýshylardyń boljamdaryna jáne álemdik naryqtardaǵy jaǵdaıǵa baılanysty bolady. Ulttyq bank teńgerimsizdikterdiń jınaqtalýyna jol bermeıtin jáne altyn-valúta rezervteriniń saqtalýyn qamtamasyz etetin ıkemdi baǵam belgileý rejımin ustanýdy jalǵastyrady», - delingen bank habarlamasynda.