Salyq kodeksiniń normasy kúshine endi.
2023 jylǵy 1 qańtardan bastap shaǵyn bıznes sýbektileri úshin arnaýly salyq rejımin qoldaný kezinde ruqsat etilmegen qyzmet túrlerin tolyqtyrý bóliginde Salyq kodeksiniń normasy kúshine endi, dep habarlaıdy Almaty-akshamy.kz Inbusiness.kz silteme jasap.
"Bul tizbeni tolyqtyrý, eń aldymen, bıznesti bólshekteý jolymen salyqtyq ońtaılandyrý sqemalarynyń aldyn alý (onyń ishinde qosalqy jaldaý tetigin paıdalana otyryp), onyń ishinde ońaılatylǵan deklarasıa negizinde arnaýly salyq rejımderin qoldaný maqsattarymen baılanysty" delingen aqparatta.
Qarjy mınıstrliginiń baspasóz qyzmeti taratqan aqparaty boıynsha, tómendegi qyzmet túrleri boıynsha Shaǵyn bıznes sýbektileri úshin arnaýly salyq rejımin qoldanýda shekteý engiziledi. Olar:
- marketıńtik qyzmetterdi;
- saýda naryǵyn jalǵa berý jáne paıdalaný jónindegi,
- saýda bazarlaryna jatatyn saýda obektilerin, saýda alańy bes júz sharshy metrden asatyn stasıonarlyq saýda obektilerin, sondaı-aq olardyń aýmaǵyndaǵy saýda oryndaryn, saýda obektilerin jáne qoǵamdyq tamaqtaný obektilerin qosalqy jalǵa berý;
- eki jáne odan da kóp salyq tóleýshilerdiń osyndaı qyzmetter kórsetiletin bir qonaq úıdiń nemese jeke turǵan turǵyn emes ǵımarattyń aýmaǵynda qonaq úı qyzmetterin usyný salasyndaǵy qyzmetke qoldanylatyn bolady.
Tıisinshe, shekteýler engizilgen joǵaryda atalǵan qyzmet túrlerin júzege asyratyn kásipkerler 2023 jyly 1 qantardan bastap jalpyǵa birdeı belgilengen salyq salý tártibine kóshýi tıis.
Al, saýda alańy bes júz sharshy metrden kem stasıonarlyq saýda obektilerine jatatyn, saýda obektilerin qosalqy jalǵa beretin salyq tóleýshiler, ony qoldanýdyń qalǵan sharttaryna sáıkes kelgen kezde shaǵyn bıznes sýbektilerine arnalǵan arnaýly salyq rejımin qoldana alady.