Parlament saılaýy - Prezıdent usynǵan saıası reformalardyń jalǵasy.
Óıtkeni, buǵan deıin Konstıtýsıaǵa ózgerister men tolyqtyrýlar engizildi. Senat pen Májilistiń qyzmeti qaıta qaraldy. Endi Májilis pen máslıhat depýtattaryn saılaý saıası reformalardy jalǵastyrýy tıis, dep habarlaıdy Almaty-akshamy.kz Qazaqstan.tv saıtyna silteme jasap.
Osyǵan deıin elimizde 7 Májilis saılaýy ótti. Alǵashqy úsheýi aralas júıemen bolsa, 2007 jyldan beri depýtattar partıalyq tizim boıynsha saılanyp keldi. Al bul jolǵy saıası alaman jańa tártip boıynsha ótedi. Iaǵnı Májilis depýtattarynyń 70 paıyzy partıalyq tizim arqyly, al qalǵan 30 paıyzy tikeleı saılanady.
Oblystar men respýblıkalyq mańyzy bar qalalardaǵy máslıhattar saılaýy da aralas úlgimen ótedi. Al aýdan-qalalardaǵy máslıhat depýtattary tolyǵymen tikeleı saılanady. Osylaısha el arasynda bedeli bar jańa tulǵalardyń saıasatqa kelýine jol ashylyp otyr. Konstıtýsıalyq reforma aıasynda saıası partıalardy tirkeý rásimi jeńildedi. Onyń shegi 4 ese, 20 myńnan 5 myń adamǵa azaıdy.Óńirlerdegi ókilder sany 600-den 200 adamǵa tómendedi. Partıa qurý úshin azamattardyń bastamashyl tobynyń eń tómengi sany úshten birge, ıaǵnı 1000-nan 700 adamǵa azaıdy. Sonymen birge saılaý búlletenine «bárine qarsymyn» degen baǵan engizildi.
Partıalardyń Májiliske ótýine qajetti daýystyń tómengi shegi 7-den 5 paıyzǵa deıin azaıdy. Saılaý úderisine qoǵamnyń túrli ókilderin barynsha tartý úshin zańnamaǵa ózgerister engizildi. Mysaly, depýtattyq mandattyń 30 paıyzyn áıelderge, jastarǵa jáne erekshe qajettiligi bar azamattarǵa bólý zań júzinde bekitildi. Bul kezekten tys saılaý bolǵanymen, onyń ótetin merzimi jarty jyl buryn belgili boldy. Byltyr, qyrkúıektegi joldaýynda Prezıdent Májilis pen Máslıhat saılaýy ótetinin aıtty.